ახალგორელებისთვის საქართველოს კონტროლირებად ტერიტორიაზე გადმოსვლა გამარტივდა – ოკუპირებული ცხინვალის ე.წ. პრეზიდენტის მოვალეობის შემსრულებლის განცხადებით, ე.წ. გამშვები პუნქტების სამუშაო განრიგი გაფართოვდება – ახალი წესის თანახმად ე.წ. რაზდახანის (ოძისის) გამშვები პუნქტი კვირაში ოთხი დღე – ხუთშაბათს, პარასკევს, შაბათს და კვირას, 8:00-დან 18:00 საათამდე იმუშავებს. ე.წ პერევის გამშვები პუნქტი კი ღია კვირაში სამი დღე – სამშაბათს, ხუთშაბათს და შაბათს, 8:00-დან 18:00 საათამდე იქნება.
მანამდე, ცოტა ხნის წინ ცნობილი გახდა, რომ რუსეთის საგარეო საქმეთა სამინისტროს მიერ მომზადებული დადგენილების პროექტით, ოკუპირებული აფხაზეთის, ცხინვალის რეგიონისა და დნესტრისპირეთის მცხოვრებლებისთვის რუსეთის მოქალაქეობის მისაღები საკონსულო მოსაკრებელი 600-დან 65 აშშ დოლარამდე მცირდება.