“სფერო ჰოლდინგის” დაზარალებულები გივი წულეისკირისა და სოფიკო პეტრიაშვილის განაჩენს ეხმაურებიან და ირაკლი კობახიძესა და სახელმწიფო სტრუქტურებს მიმართავენ.
მათი თქმით, 570 ოჯახისთვის “9-თვიანი კოშმარი” დასრულდა, თუმცა ქონება, რომელიც დაკავებულების სახელზე არის 32-მილიონიან ზარალს ვერ აანაზღაურებს.
დაზარალებულები აქციების დაწყებას აანონსებენ და მთავრობას მოუწოდებენ საქმეში ჩაერთონ.
დასრულდა 9-თვიანი კოშმარი 570 ოჯახისთვის. 12 წელი მიუსაჯა მოსამართლე მახარობლიძემ დამფუძნებელ, მთავარ თაღლით, გივი წულეისკირს და ასევე შემსრულებელ თაღლითს სოფიკო პეტრიაშვილს მიესაჯა 8 წელი. ჩვენთვის ყველაზე მნიშვნელოვანი – ქონებები, რაც მათ ეკუთვნოდათ, რაც “სფერო ინვესტს” ეკუთვნოდა, რაც იყო პროკურატურის მიერ დაყადაღებული, მიექცა ყველა დაზარალებულის საკეთილდღეოდ.
თუმცა დღეს ჩვენი მთავარი მოთხოვნა რჩება მოთხოვნად. ქონება, რაც თაღლითების სახელზე არის ვერ აკმაყოფილებს 570 ოჯახის ზარალს, რომელიც არის 32 მილიონი ლარი. 3 წლის განმავლობაში, თაღლითური დაჯგუფება სფერო ჰოლდინგი ყველაზე გაჭირვებული ხალხისგან ითვისებდა თაღლითურად თანხას.
ჩვენ აქ არ ვამთავრებთ, ვგეგმავთ აქციებს. ჩვენი მთავარი მოთხოვნაა, რომ ხელისუფლებისგან მოხდეს რაც შეიძლება სწრაფად ჩართულობა, დაგვიკავშირდნენ. მათი პასუხი ჩვენ წერილზე ყოველთვის იყო, რომ მიმდინარეობს გამოძიება, მიმდინარეობს სასამართლო. დღეს დასრულდა სასამართლო, გამამტყუნებელი განაჩენი გვაქვს სახეზე.
მივმართავ ბატონ ირაკლი კობახიძეს და ყველა სახელმწიფო სტრუქტურას, 570 ოჯახი იმყოფება ქუჩაში წელიწადზე მეტია. გთხოვთ ჩაერთოთ ამ საქმეში,” – ამბობენ დაზარალებულები.