უნგრელი ჟურნალისტის, ლასლო რობერტ მეზესის გადაწყვეტილებით, ის საქართველოს საკუთარი ნებით დატოვებს. ამის შესახებ ინფორმაციას მისი მეგობარი, გიორგი თარხნიშვილი ავრცელებს.
ამ დროისთვის დაკავებულ ჟურნალისტთან, საქართველოს შინაგან საქმეთა სამინისტროს მიგრაციის დეპარტამენტში, მისი ადვოკატი, თორნიკე ჯანელიძეა შესული.
ლასლო რობერტ მეზესთან შესვლამდე უფლებადამცველმა განაცხადა, რომ მანაც საჯაროდ გავრცელებული ინფორმაციით გაიგო უნგრელი ჟურნალისტის გადაწყვეტილება და დაინტერესდა, თუ რატომ შეიცვალა აზრი ლასლო რობერტ მეზესმა.
ადვოკატის თქმით, ნებისმიერი გადაწყვეტილების შემთხვევაში ჯერ მაინც სასამართლო უნდა გაიმართოს.
ჩემთვისაც ისევე გახდა ცნობილი ის ფაქტი, როგორც თქვენთვის, საჯაროდ გავრცელებული ცნობების შემდეგ და როგორც კი ეს ფაქტი ვნახე, მას შემდეგ გამოვემართე, რომ კვლავ შევხვდე ლასლოს, თუ ჯერ გადაყვანილი არ არის, იმედი მაქვს, რომ მოვახერხებ მის ნახვას და გასაუბრებას, თუ რა გახდა მიზეზი ამ გადაწყვეტილების მიღების, რადგან გგუშინ ღამით რომ ვისაუბრეთ ის ასე არ ფიქრობდა. შევეცდები ვნახო და ამის შემდგომ გავაკეთებ კომენტარს მისი ნებართვით.
ჯერ მაინც უნდა გაიმართოს სასამართლო და ამის შემდგომ გაირკვევა უკვე ვადები და ის თუ სად მოთავსდება მანამდე, დარჩება თუ არა მიგრაციის სამსახურში, თუ გამოშვებენ სახლში და შემდეგ შეძლებს გაფრენას,” – განაცხადა თორნიკე ჯანელიძემ.
ცნობისთვის, ლასლო რობერტ მეზესი საემიგრაციო სამსახურმა, გუშინ, 5 აგვისტოს, დააკავა. მოგვიანებით, შინაგან საქმეთა სამინისტრომ “პირველებს” განუცხადა, რომ უნგრელი ჟურნალისტი საქართველოში კანონიერი საფუძვლის გარეშე იმყოფება და დარღვეული აქვს ქვეყანაში ყოფნის ვადები.