გიგა ავალიანის მკვლელობის საქმის ფიგურანტის, ნია იმნაძის დაკავებასთან დაკავშირებით ოპოზიციურ სპექტრში არსებულ კითხვებსა და უკმაყოფილებას, მოკლული მასწავლებლის დედა, ეკა კუპატაძე ეხმიანება. კერძოდ, მან კომენტარი დაწერა ნანა ჟორჟოლიანის ფეისბუქ-პოსტზე და განაცხადა, რომ დღევანდელი “პოსტაობა” სირცხვილი და დანაშაულის ტოლფასი შეცდომაა.
„ღმერთმა არ ქნას, ჩვენს ქვეყანაში ნია იმნაძეებმა, გიორგი მალანიებმა, ალექსანდრე გაბაშვილებმა, გიორგი რიჟაძეებმა, დემეტრე ჩიქოვანებმა, ანი ნასყიდაშვილებმა და ანასტასია ბერუაშვილებმა იბატონონ.
ჩემთვის აღარც აწმყოა და მით უფრო, არც მომავალი, მაგრამ თქვენთვის დადგება დრო და თქვენი დღევანდელი პოსტაობა, საკუთარ თავთან შეგარცხვენთ. ეს არის დანაშაულის ტოლფასი შეცდომა, რომლის გამოსწორებაც შეუძლებელია. ვადასტურებ წარსულში თქვენდამი დიდ პატივისცემას,” – წერს ეკა კუპატაძე.
საპასუხოდ, ჟორჟოლიანმა განაცხადა, რომ იმნაძე, დანაშაულის ჩადენიდან 10 თვის შემდეგ დააკავეს და ბევრი კითხვაა ამასთან დაკავშირებით.
„ვწუხვარ თქვენს შეფასებას. არც მალანიაზე და განსაკუთრებით სხვა გვარებზე კითხვა არ ყოფილა.ამ ეპიზოდზე თქვენვე ამბობდით რომ მტკიცებულებები არ იყო და ლეგიტიმური ეჭვი გქონდათ მათი გაქრობის.ყველა იურისტმა იცის რომ დაკავებისთვის მნიშვნელოვანია ახალი გარემოება.ამ ნაწილში რომ კითხვები დაისვა, რადგან დაკავება 10 თვის შემდეგ მოხდა, რა მტკიცებულებები გაჩნდა, ტელეფონი გაიხსნა, რა ეწერა, ბევრი კითხვაა კიდევ, ეს რომ პრობლემაა მხოლოდ მიკვირს,” – წერს ჟორჟოლიანი, რომელსაც ეკა კუპატაძემ პასუხად დაუწერა: „ვერაფერიც ვერ გაიგეთ. მე თქვენ თქვენს შეცდომაზე გეუბნებით. თქვენი შეცდომა არის დანაშაულის ტოლფასი, რომლის გამოსწორებაც შეუძლებელია“.