ნამდვილად ვერ ვიტყვი, ვინ როდის გახდა რუსოფობი. შემიძლია ვთქვა, რომ ირაკლი კობახიძე არის ის სამარცხვინო პრემიერ-მინისტრი, რომელიც ამ ქვეყნის ისტორიაში შევა, როგორც რუსეთის საგარეო დაზვერვის სპეცოპერაციის გამტარი პოლიტიკოსი, – ამის შესახებ გრიგოლ გეგელიამ განაცხადა, რითაც პრემიერ-მინისტრ ირაკლი კობახიძის პოსტს გამოეხმაურა.
გეგელიას შეფასებით, დანამდვილებით შეუძლია თქვას, რომ ირაკლი კობახიძე არის ქართველების წინააღმდეგ მოქმედი პოლიტიკოსი.
„მე ნამდვილად ვერ ვიტყვი, ვინ როდის გახდა რუსოფობი. შემიძლია ვთქვა, რომ „ლელო-ძლიერი საქართველოს“პოლიტიკურ ლიდერებს, გუნდს ყოველთვის ჰქონდათ თანმიმდევრული პოზიცია რუსეთის ფაშისტურ ფედერაციასთან დაკავშირებით, თუმცა შემიძლია დანამდვილებით გითხრათ, რომ ირაკლი კობახიძე მაშინაც იყო და ახლაც არის რუსოფილი. კობახიძე არის ის სამარცხვინო პრემიერ-მინისტრი, რომელიც ამ ქვეყნის ისტორიაში შევა, როგორც რუსეთის საგარეო დაზვერვის სპეცოპერაციის გამტარი პოლიტიკოსი, ქართველების წინააღმდეგ მოქმედი პოლიტიკოსი და ქართული სახელმწიფოს ეროვნული, სუვერენული ინტერესებისთვის რუსეთის დავალებით ძირის გამომთხრელი პოლიტიკოსი. ეს დანამდვილებით შემიძლია ვთქვა“, – განაცხადა გრიგოლ გეგელიამ.
ცნობისთვის, ირაკლი კობახიძე სოციალურ ქსელში პოსტს აქვეყნებს, რომელიც რუსეთისადმი ამჟამად და წინა ხელისუფლების დროს არსებულ განწყობებს შეეხება. როგორც კობახიძე წერს, „უცხოური აგენტურის რიტორიკა რუსეთის მიმართ ასეთი მკაცრი და უარყოფითი არც 2008 წლის ომამდე და არც აგვისტოს ომის შემდეგ არ ყოფილა“. პრემიერის თქმით, აღნიშნულ კონტექსტში ჩნდება ლოგიკური კითხვა: „რატომ იქცნენ რუსოფობებად ახლა და არა მაშინ“.