თბილისის საქალაქო სასამართლოში ელისო კილაძის პროცესი უკვე რამდენიმე საათია მიმდინარეობს. სხდომა კვლავ დახურულია. დღევანდელ პროცესზე ერთ-ერთი “ქოლ-ცენტრის” დამფუძნებლის დაცვის თანამშრომელი იკითხება.
დაკავებული ჟურნალისტის, ელისო კილაძის უფლებადამცველი, ნათია კოტრიკაძე ამბობს, რომ მოწმეები გიორგი ჯიბლაძის დაცვის თანამშრომლები იყვნენ, თუმცა ვერ იგებს მათ საქმეთან რა შემხებლობა აქვთ.
ეს პირები იყვნენ გიორგი ჯიბლაძის დაცვის თანამშრომლები, მაგრამ ელისო კილაძესთან რა შემხებლობა აქვთ, ვერ გავიგე. კიდევ გეუბნებით, ოფისი, სადაც მდებარეობდა აღნიშნული ქოლ-ცენტრები, იმ ოფისში მუშაობდა ელისო კილაძე, მეხუთე სართულზე იყო ე.წ. ქოლ-ცენტრები. აღნიშნულ სართულზე ვალერი გელბახიანი იყო თვითონ, რომელიც იურიდიულ მომსახურეობას ეწეოდა. შესაძლებელი იყო ჯიბლაძეს მფარველობდა ელისო კილაძე იმიტომ, რომ მას ეშინოდა ნარკოტიკული ნივთიერებების ჩადების და ხშირად სახლში მიჰყავდა ელისოს და მათთან რჩებოდა, ჯიბლაძე დიახ და შესაძლებელი იყო, ჩვეულებრივად ელისო კილაძე ასულიყო მეხუთე სართულზე იმიტომ, რომ როცა ჩენ წინა პროცესზე დავკითხეთ ვითომ დაცვის თანამშრომელი და სინამდვილეში იყო დარაჯი, რომელიც აკონტროლებდა ვინ შევიდოდა და ვინ გამოვიდოდა, პირველ სართულზე, მან აღნშნა, რომ იქ სასადილო ოთახი არ იყო და სინამდვილეში დადასტურდა ის ფაქტი, რომ სასადილო ოთახი განთავსებული იყო მეხუთე სართულზე, ყველას შეეძლო ასულიყო, ყავა დაელიათ, ესაუბრათ,” – განაცხადა ნათია კოტრიკაძემ.
პროკურორის თქმით, მოწმეების მიერ გამოკითხვის ოქმებში მითითებული ინფორმაცია ძალიან მნიშვნელოვანია.
ბრალდებულ ელისო კილაძესთან მიმართებითაც ისინი ფლობენ ინფორმაციას და ვფიქრობ, რომ მათ მიერ მოსაწოდებელი ინფორმაცია, რაც გამოკითხვის ოქმებშია დაფიქსირებული, არის ძალიან მნიშვნელოვანი. დეტალები, ელისო კილაძე ვისთან და რა ფორმით იყო შეთანმხებული, რა თქმა უნდა ამ პირებისთვის ცნობილი არ არის…” – განაცხადა საქმის პროკურპორმა.
ელისო კილაძე ე.წ. ქოლ-ცენტრების საქმეზე ფინანსთა სამინისტროს საგამოძიებო სამსახურის თანამშრომლებმა ქუჩაში 18 თებერვალს დააკავეს.
„ქრონიკა პლუსის“ დამფუძნებელს ყოფილ გენერალურ პროკურორ ოთარ ფარცხალაძესა და ბიზნესმენ ძმებ დავით და გიორგი მიქაძეებთან ერთად თაღლითობასა და ფულის გათეთრებას ედავებიან. ელისო კილაძე დაკავების პირველივე დღიდან ამბობს, რომ ის მამუკა მდინარაძის შურისძიების მსხვერპლია.
ცნობისთვის, ე.წ. ქოლ ცენტრების საქმეზე საერთო ჯამში 10 პირია ბრალდებული. ელისო კილაძეს, ოთარ ფარცხალაძეს, გიორგი მიქაძეს, დავით მიქაძეს, ირაკლი სეხნიაშვილს, მიხეილ ჩოხელს, გივი ჯიბლაძეს, ბენ ანორს, თორნიკე ჯანელიძესა და გიორგი კამლაძეს ბრალი სისხლის სამართლის კოდექსის 180-ე და 194-ე მუხლებით აქვთ წარდგენილი, რაც ორგანიზებული ჯგუფის მიერ თაღლითობასა და უკანონო შემოსავლის ლეგალიზაციას (ფულის გათეთრებას) გულისხმობს.
კილაძის საქმის წარმოება ცალკე წარმოებადაა გამოყოფილი – სასამართლო პროცესები დახურულ რეჟიმში მიმდინარეობს.