“გაჩერდი, თორემ კბილებს ჩაგილეწავ…” – ქუთაისში მცხოვრები ქალი ამბობს, რომ პატრულის თანამშრომლისა და მისი მეგობრის თაღლითობის მსხვერპლი გახდა

ქუთაისში მცხოვრები ქალი ამბობს, რომ პატრულის მოქმედი თანამშრომლისა და მისი მეგობრის თაღლითობის მსხვერპლი გახდა – ამის შესახებ მან ადგილობრივ გამოცემასთან – “ინფო იმერეთი” – ისაუბრა. მისი თქმით, სოციალურ ქსელში გაცნობილი კაცი ბიზნესმენად გაეცნო, მასთან შეხვედრებს კი მისი მეგობარი – პატრულის მოქმედი თანამშრომელი სისტემატურად ესწრებოდა.
ქალი იხსენებს, რომ გაცნობიდან რამდენიმე კვირაში თანხა მოსთხოვეს, რის შემდეგაც მათ დასახმარებლად ბანკში ძვირფასი ნივთები ჩადო, 4 000 დოლარი ანგარიშზე დაურიცხა, 2 500 დოლარი კი ხელზე იმ პირობით გადასცა, რომ 3 დღეში დაუბრუნებდნენ. მისივე თქმით, ამის შემდეგ მას თანხა კიდევ ერთხელ სთხოვეს და უთხრეს, რომ ფული რუსეთიდან უკვე გადმორიცხული იყო, თუმცა ორ ქვეყანას შორის არსებული დაძაბული ფონის გამო დროულად ვერ ირიცხებოდა. ქალმა მათ დასახმარებლად შვილის მონაცემებით ისევ გამოიტანა სესხი და 30 000 ლარი დაამატა.
“უკვე თანხა რომ მოვითხოვე, ეს ვითომ ჩემი შეყვარებული აგრესიული გახდა. “გაჩერდი, თორემ კბილებს ჩაგილეწავო“ – მემუქრებოდა. ამის შესახებ საქმის კურსში იყო პატრულის თანამშრომელიც, თუმცა რეაგირებას არ ახდენდა. შემდეგ ორივეს ვუთხარი, რომ ვუჩივლებდი, რის შემდეგაც პატრულმა სიმბოლური თანხების დარიცხვა დაიწყო, რაც, რა თქმა უნდა, ზღვაში წვეთი იყო. ეს ჩემი ვითომ შეყვარებულიც და პატრულიც გუშინ დააკავეს. ჩემი პრიორიტეტია ზარალის ანაზღაურება მოხდეს მათი მხრიდან, სხვა არანაირი პრეტენზია არ გამაჩნია მათ მიმართ, მთავარია ჩემი თანხა დამიბრუნდეს“, – ამბობს ნონიმურობის დაცვის პირობით ქალი ინფო იმერეთთან. გამოცემის ცნობით, აღნიშნული ორივე პირი ამ დროისთვის დაკავებულია.