ვახო სანაიას იმიტომ კი არ იჭერენ, რომ ჰგონიათ გააჩუმებენ, არამედ იმიტომ, რომ ჰგონიათ სხვა ჟურნალისტებიც გაჩუმდებიან, თუ დაინახავენ, რომ ჟურნალისტებს იჭერენ – ამის შესახებ „თავისუფლების მოედნის” წევრმა, სიმონ
ჯანაშიამ „ინტერპრესნიუსს” ჟურნალისტ ვახო სანაიას დაკავებასთან დაკავშირებით განუცხადა.
მისი თქმით, რაც ნაკლები ჟურნალისტი იქნება, ვისაც არსებული პრობლემების გასაჯაროება შეუძლია, მით უფრო კომფორტული იქნება „ქართული ოცნებისთვის”.
„როცა ვერ აგვარებენ პრობლემებს, როცა ვერ აკავებ ნამდვილ დამნაშავეებს, უნდა დააკავონ ხალხი, ვისაც შეუძლია სააშკარაოზე გამოიტანონ ეს პრობლემა. ჟურნალისტებს ებრძვიან არა მხოლოდ დაკავებით, ვითომ გამჭვირვალობის კანონის ერთ-ერთი მთავარი სამიზნე იყო მედია. ვახო სანაია არ არის პირველი ჟურნალისტი, რომელიც დააკავეს, გვყავს მზია ამაღლობელი ციხეში, რომლის მთელი საქმიანობა იყო მიმართული იქით, რომ სააშკარაოზე გამოეტანა, მაგალითად, კორუფციის პრობლემები და ვახო სანაიამ სინამდვილეში ძალიან მარტივი გზით სამსჯავროზე გამოიტანა სიტყვის და თავისუფლების შეზღუდვის საკითხი, ჰო?
მთელი მისი მოქმედება იყო მიმართული იქით, რომ ეჩვენებინა, რომ ის, რასაც აკეთებს „ქართული ოცნება“ ამ რაღაცა ახალი კანონის შემოღებით, არის მიმართული იქით, რომ შეგვიზღუდოს უფლებები და არა იმისთვის, რომ იყოს საზოგადოების შიგნით მართლა მშვიდობა, როგორც ამას თვითონ ფუთავენ. რაც ნაკლები ჟურნალისტი იქნება ჩართული სხვადასხვა პრობლემის გაშუქებაში, მით უფრო კომფორტულია „ოცნებისთვის“ და ვახო სანაიას იმიტომ კი არ იჭერენ, რომ ჰგონიათ გააჩუმებენ, არამედ იმიტომ, რომ ჰგონიათ სხვა ჟურნალისტებიც გაჩუმდებიან, თუ დაინახავენ, რომ ჟურნალისტებს იჭერენ, მათ შორის, ცნობილ ჟურნალისტებს, ისეთს როგორიც ვახო სანაიაა”, – განაცხადა სიმონ ჯანაშიამ.
ჯანაშიამ ასევე ისაუბრა ე.წ. საბოტაჟის საქმის სასამართლო პროცესების შემოდგომამდე გადადების საკითხზე და აღნიშნა, რომ ეს ბევრ ფაქტორთან ერთად შესაძლოა ყულევის ტერმინალის დასანქცირებასთანაც იყოს კავშირში.
„შეიძლება ეს მოლაპარაკებების ნაწილიც იყოს, არა მხოლოდ საერთაშორისო, არამედ ადგილობრივ დონეზეც. მათ შორის, პარტიების შიგნითაც შეიძლება იყოს ეს საკითხი, მაგალითად, „ქართულ ოცნებაში“ შიგნით არ იყოს ერთიანობა ამ საკითხთან დაკავშირებით. შეიძლება რაღაც ვაჭრობის ნაწილი იყოს საერთაშორისო მასშტაბით და ყულევის დასანქცირებაც შეიძლება იყოს ამ პროცესის ნაწილი, მაგალითად, იმედი ჰქონდათ, რომ ეს გადავადება გადაარჩენდა“, – განაცხადა სიმონ ჯანაშიამ.