“დღეს, “კოალიცია ცვლილებისთვის“ სპეციალურ მიმართვას უგზავნის ევროკავშირის უმაღლეს წარმომადგენელს საგარეო და უსაფრთხოების საკითხებში, ევროკომისიის პრეზიდენტს, ევროპული საბჭოს პრეზიდენტს, ევროკომისარს გაფართოების საკითხებში, ევროკავშირის წევრი ქვეყნების საგარეო საქმეთა სამინისტროებს, რათა სირიის ხელისუფლებასთან კომუნიკაციისას კიდევ უფრო გააქტიურდეს საქართველოს ოკუპირებული ტერიტორიების აღიარების გაუქმების საკითხი.
მას შემდეგ, რაც 17 ივლისს ევროკავშირის უმაღლესმა წარმომადგენელმა საგარეო და უსაფრთხოების საკითხებში და ლიეტუვის საგარეო საქმეთა სამინისტრომ გაავრცელეს სპეციალური მიმართვები სირიის პარლამენტისადმი, პოლიტიკური კონტექსტი კიდევ უფრო ცხადი გახდა:
• ევროკავშირი მზადაა სირიის დასახმარებლად, თუ ქვეყანა დაიცავს საერთაშორისო სამართლის პრინციპებს, მათ შორის დაადასტურებს საქართველოსა და უკრაინის ტერიტორიულ მთლიანობას.
•ამ ფონზე, ივანიშვილის რეჟიმი სტრატეგიულ მოკავშირედ აცხადებს ჩინეთის კომუნისტურ პარტიას, რომელიც არ აღიარებს საქართველოს ტერიტორიულ მთლიანობას და ექვემდებარება კრემლს, რომელსაც ჩვენი მიწები აქვს ოკუპირებული. „ქართული ოცნება“ ღალატობს საქართველოს ეროვნულ ინტერესებს.
შეგახსენებთ, რომ “კოალიცია ცვლილებისთვის” სხვა ოპოზიციურ პარტიებთან ერთად, ასადის რეჟიმის ცვლილებისთანავე, ოფიციალური წერილით მიმართა სირიის ახალ პოლიტიკურ ხელმძღვანელობას და მოითხოვა აფხაზეთისა და ე.წ. სამხრეთ ოსეთის დამოუკიდებელ სახელმწიფოებად აღიარების გაუქმება. აგრეთვე ოფიციალური მიმართვა გაეგზავნა სირიის ელჩს გაეროში. კოალიციამ გამართა შეხვედრა სომხეთში სირიის ელჩთან და ყველა საერთაშორისო შეხვედრაზე ჩვენს ამერიკელ და ევროპელ პარტნიორებთან ვაყენებთ საკითხს, რომ საქართველოს ოკუპირებული ტერიტორიების აღიარების გაუქმება ჩვენი პარტნიორების დღის წესრიგის ნაწილი იყოს სირიის ხელისუფლებასთან კომუნიკაციისას.
დარწმუნებულნი ვართ, რომ აღნიშნული ძალისხმევა აუცილებლად გამოიღებს შედეგს.
აფხაზეთი საქართველოა!
ცხინვალის რეგიონი საქართველოა!” – ნათქვამია კოალიცია ცვლილებისთვის განცხადებაში
ლიეტუვის საგარეო საქმეთა სამინისტრომ 17 ივლისს გაავრცელა ინფორმაცია, რომ “„ევროკავშირი და მისი წევრი ქვეყნები მზად არიან იმუშაონ სირიის სახალხო კრებასთან [პარლამენტთან] და საერთო მიზნებისთვის იმუშაონ, მათ შორის საერთაშორისო სამართლისა და გაეროს ქარტიის დაცვისთვის ასადის დროს მიღებული გადაწყვეტილებების გაუქმებით, რომლებმაც აღიარეს უკრაინისა და საქართველოს სუვერენიტეტისა და ტერიტორიული მთლიანობის დარღვევა”