2026 წლის პირველ სამ თვეში საქართველოში ავტოსაგზაო შემთხვევებს 92 ადამიანი ემსხვერპლა, 989 კი დაშავდა. ოფიციალური სტატისტიკის მიხედვით, ავარიების ყველაზე მაღალი მაჩვენებელი თბილისში და შიდა ქართლში ფიქსირდება.
ოფიციალური მონაცემები აჩვენებს, რომ საგზაო უსაფრთხოება საქართველოში კვლავ ერთ-ერთ უმწვავეს პრობლემად რჩება. მიუხედავად იმისა, რომ ხელისუფლება ჯარიმების გაზრდას ავარიების შემცირების ერთ-ერთ მექანიზმად ასახელებდა, მძიმე შემთხვევები კვლავ ხშირია.
პარტნიორობა “საგზაო უსაფრთხოლებისთვის” დირექტორი ირაკლი იზორია იმ რეკომენდაციებზე საუბრობს. მისი შეფასებით, მხოლოდ ჯარიმების არსებობა საკმარისი არ არის – აუცილებელია როგორც საგზაო ინფრასტრუქტურის გაუმჯობესება, ისე კანონის სრულფასოვანი აღსრულება.
“ბოლოს უკვე შეცვალეთ კანონმდებლობა და დაახლოებით 30-50 მდ გადაჭარბებისთვის, წესით, 10 ქულა უნდა ჩამოაკლდეს მძღოლს, ხოლო 30 კმ საათის მაღლა თუ არის გადაჭარბება, ამ შემთხვევაში 20 ქულა აკლდება, თუმცა ქულები მხოლოდ და მხოლოდ ფურცელზე გვიწერია, რეალურად არ ხდება ამის მოკლება. აქედან გამომდინარე, ვფიქრობ, რომ აუცილებელია და სასწრაფოა ქულების დანერგვა, მიებას სიჩქარეზე, ვინაიდან ყველაზე დიდი პრობლემა ქვეყანაში მაინც ეს ქულები რჩება და ჩვენ ვიცით და ვხედავთ, ადამიანები ათასობით ლარის ჯარიმას იხდიან, მაგრამ მაინც ჩქარა გადაადგილდებიან. ამიტომ უალტერნატივოა ის, რომ ქულები უნდა იყოს შემოღებული.
მძღოლები მოპედების და ელექტროსკუტერების არ იცავენ წესებს. ამის რეალური შედეგი არის ის, რომ ხშირად ვხედავთ უკვე დაზიანებულ, დაშავებულ ადამიანებს ქუჩებში” – ამბობს იზორია.
“ქართულ ოცნებაში” კი ამტკიცებენ, რომ ამ მიმართულებით ხელისუფლება ქვეყანაში გამოწვევებს ჯეროვნად და ადეკვატურად პასუხობს.
“სახელმწიფო არის ძალიან ადეკვატური ყველა იმ გამოწვევის მიმართ, რომელიც ქვეყანაშია, ზოგადად, ასევე ავტოსატრანსპორტო შემთხვევებთან მიმართებით, საგზაო წესების კიდევ უფრო მეტად სრულყოფასთან მიმართებით. ასე რომ, ნებისმიერ გამოწვევას ჩვენი ხელისუფლება პასუხობს ჯეროვნად და ადეკვატურად. აქედან გამომდინარე, შეგნებულად იმ სცენარის დახატვა, თითქოს რაღაც განსაკუთრებული ხდება, არ ივარგებს. პირველ რიგშ, თვითშეგნების დონე უნდა ამაღლდეს ჩვენი საზოგადოების” – ამბობს დავით მათიკაშვილი.