14-16 ივლისს საქართველოში მაღალი ტემპერატურის ფონზე არამდგრადი ამინდი შენარჩუნდება. სინოპტიკოსების პროგნოზით, ქვეყნის მასშტაბით მოსალოდნელია დროგამოშვებითი ნალექი, ზოგან ელჭექი, სეტყვა და ქარის გაძლიერება.
თბილისში საღამოს საათებში მოსალოდნელია ხანმოკლე წვიმა ელჭექით და ქარის გაძლიერება. ჰაერის ტემპერატურა დღისით +31…+33 გრადუსი იქნება.
სანაპირო ზოლში – ბათუმში, ქობულეთში, ანაკლიასა და ფოთში – დროგამოშვებით იწვიმებს, მოსალოდნელია ელჭექიც. დღისით ჰაერი +27…+29 გრადუსამდე გათბება.
დასავლეთ საქართველოს დაბლობ რაიონებში, მათ შორის ქუთაისში, ზესტაფონში, სამტრედიაში, ზუგდიდში, მარტვილსა და ოზურგეთში, ასევე მოსალოდნელია ხანმოკლე წვიმა და ელჭექი. ტემპერატურა +28…+30 გრადუსის ფარგლებში იქნება.
დასავლეთ საქართველოს მთიან და მაღალმთიან რაიონებში – ამბროლაურში, ონში, ცაგერში, შოვში, ჭიათურაში, საჩხერეში, ხულოსა და რიკოთის უღელტეხილზე, ასევე მესტიასა და ბახმაროში – მოსალოდნელია ხანმოკლე წვიმა ელჭექით. დღისით ჰაერის ტემპერატურა მთიან რაიონებში +26…+28, ხოლო მაღალმთიან რაიონებში +25…+27 გრადუსი იქნება.
ქართლსა და კახეთში ზოგან მოსალოდნელია ხანმოკლე წვიმა, ელჭექი, სეტყვა და ქარის გაძლიერება. ჰაერის ტემპერატურა +32…+34 გრადუსამდე მოიმატებს.
აღმოსავლეთ საქართველოს მთიან რაიონებში – ახალციხეში, ბორჯომში, დუშეთში, თიანეთსა და ფასანაურში – ასევე მოსალოდნელია წვიმა, ელჭექი, ადგილობრივად სეტყვა და ძლიერი ქარი. ტემპერატურა +27…+29 გრადუსი იქნება.
მაღალმთიან რეგიონებში – ახალქალაქში, წალკაში, ბაკურიანში, გუდაურსა და ომალოში – სინოპტიკოსები ხანმოკლე წვიმას, ელჭექს, ზოგან სეტყვასა და ქარის გაძლიერებას პროგნოზირებენ. დღისით ჰაერის ტემპერატურა +22…+24 გრადუსს მიაღწევს.
მეტეოროლოგები მოსახლეობას ურჩევენ, განსაკუთრებით ელჭექისა და სეტყვის დროს, გამოიჩინონ სიფრთხილე, რადგან ცალკეულ რაიონებში ამინდი შესაძლოა მკვეთრად შეიცვალოს.