,,გავაკეთებთო, ახლა მოვალთ, ახლა მოვალთო. სად არიან?! წყალი არ მაქვს 79 წლის ქალს. სად არიან, რატომ არ აკეთებენ?… ვარ უპატრონოდ და რომელი მყავს ამ ქვეყანაში პატრონი? თვითონ სვამენ, ჭამენ და ძღებიან. ეს ადრევე უნდა გაწმენდილიყო, რომ ეს ამბავი არ მომხდარიყო, მაგრამ პატრონი არავის არა ჰყავს” [ფორმულა] – ამბობს თელავში, სტიქიით დაზარალებული ერთ-ერთი ადგილობრივი.
12 ივლისს, გვიან ღამით, უხვი ნალექის შედეგად მდინარე თელავის ხევი ადიდდა. მოვარდნილი ღვარცოფი ქალაქის ქვედა ნაწილში მდებარე ხიდმა ვერ გაატარა, ქვა-ღორღით გავსებულმა მდინარემ, რომელიც კალაპოტიდან გადმოვიდა, ქალაქის არა ერთი ქუჩა დატბორა. სტიქიის შედეგად დაიტბორა საცხოვრებელი სახლები, მაღაზიები, აფთიაქები, მიმდებარე ტერიტორიაზე არსებული ყველა სახელმწიფო და კომერციული ობიექტი. კახეთში სტიქიამ ვენახები გაანადგურა – თელავის გარდა, ძლიერმა წვიმამ სოფლებიც დააზარალა. ხევები ადიდდა წინანდალში, კისისხევსა და კურდღელაურშიც. ადგილობრივების ნაწილს დაეხოცა პირუტყვიც.