თელავში მოქალაქეების ნაწილი ამ დრომდე სასმელი წყლის, ელექტროენერგიის, ბუნებრივი აირისა და ინტერნეტის გარეშეა დარჩენილი – ამის შესახებ მთავარს ადგილობრივები აწვდიან ინფორმაციას. სტიქიის შემდეგ, ქალაქში გაწმენდითი სამუშაოები მიმდინარეობს, ქუჩები ქვა-ღორღისგან იწმინდება.
12 ივლისს, გვიან ღამით, უხვი ნალექის შედეგად მდინარე თელავის ხევი ადიდდა. მოვარდნილი ღვარცოფი ქალაქის ქვედა ნაწილში მდებარე ხიდმა ვერ გაატარა, ქვა-ღორღით გავსებულმა მდინარემ, რომელიც კალაპოტიდან გადმოვიდა, ქალაქის არა ერთი ქუჩა დატბორა. სტიქიის შედეგად დაიტბორა საცხოვრებელი სახლები, მაღაზიები, აფთიაქები, მიმდებარე ტერიტორიაზე არსებული ყველა სახელმწიფო და კომერციული ობიექტი. კახეთში სტიქიამ ვენახები გაანადგურა – თელავის გარდა, ძლიერმა წვიმამ სოფლებიც დააზარალა. ხევები ადიდდა წინანდალში, კისისხევსა და კურდღელაურშიც. ადგილობრივების ნაწილს დაეხოცა პირუტყვიც.