ქართველმა მოსწავლეებმა პროექტ „მეხსიერების მატარებლის“ ფარგლებში ბელარუსისა და რუსეთის 13 ქალაქი მოინახულეს – ინფორმაციას Facebook-გვერდზე საქართველოში შვეიცარიის საელჩოს რუსეთის ინტერესების სექცია ავრცელებს და წერს, რომ ქართველმა მოსწავლეებმა დაასრულეს მონაწილეობა პროექტ „მეხსიერების მატარებლის“ საიუბილეო სეზონში.
“საქართველოს სხვადასხვა ქალაქიდან ჩასულმა უფროსკლასელებმა ბელარუსელ, რუს და სხვა ქვეყნების თანატოლებთან ერთად გაიარეს დიდი სამახსოვრო მარშრუტი, რომელიც დიდი სამამულო ომის ისტორიას მიეძღვნა. მოგზაურობის განმავლობაში მათ ბელარუსისა და რუსეთის 13 ქალაქი მოინახულეს. სიმბოლურია, რომ საიუბილეო სეზონი მინსკში დასრულდა, ხოლო სტარტი ბრესტის ციხესიმაგრის კედლებთან აიღო, საიდანაც დიდი სამამულო ომი დაიწყო. თბილისელმა მოსწავლემ ორგანიზატორებთან ერთად საერთო პანოზე მინსკის სიმბოლიკიანი ნიშანი დაამაგრა, როგორც ხალხთა ერთიანობისა და საერთო ისტორიული მეხსიერების სიმბოლო” – ნათქვამია ინფორმაციაში.
ამავე პოსტის თანახმად, რუსეთის ფედერაციის საბჭოს თავმჯდომარის მოადგილემ, კონსტანტინ კოსაჩოვმა, “განსაკუთრებით აღნიშნა ქართველი მოსწავლეების მონაწილეობა”.
„ძალიან გვიხარია, რომ „მეხსიერების მატარებელში“ უკვე აღარ არის პირველი წელი, რაც ჩვენთან ერთად არიან ბავშვები საქართველოდან. ის მოზარდები, რომლებმაც „მეხსიერების მატარებლის“ მარშრუტი გაიარეს, კეთილი ნების ელჩები ხდებიან და დარწმუნებული ვარ, ისინი შეძლებენ იმას, რაც, შესაძლოა, ჩვენ ვერ შევძელით – აღადგინონ და განავითარონ ჩვენი ურთიერთობები, გახადონ ისინი ნამდვილად მეგობრული, რადგან ეს ყველას ძალიან გვინდა“ – განაცხადა კოსაჩოვმა.