რუსეთის ქალაქ ვოლგოგრადზე სარაკეტო თავდასხმა განხორციელდა. გავრცელებული ინფორმაციით, იერიშის სამიზნე იყო სამხედრო-სამრეწველო კომპლექსის ერთ-ერთი უმნიშვნელოვანესი საწარმო „ტიტან-ბარიკადები“, სადაც იწარმოება სარაკეტო სისტემები „ისკანდერ-М“, „ტოპოლ-М“ და „იარსი“.
OSINT-ანალიტიკოსებისა და გამოცემა ASTRA-ს ცნობით, თავდასხმა, სავარაუდოდ, უკრაინულმა შორი მოქმედების ფრთოსანმა რაკეტებმა „ფლამინგომ“ განახორციელეს. სოციალურ ქსელებში ვრცელდება იერიშის ამსახველი ვიდეოკადრებიც.
ვოლგოგრადის ოლქის გუბერნატორმა ანდრეი ბოჩაროვმა დაადასტურა, რომ ქალაქზე უკრაინული რაკეტებით შეტევა განხორციელდა. მისი განცხადებით, დაზიანებულია სამრეწველო საწარმოს ობიექტები, ხოლო ბოლო მონაცემებით, დაშავებულია 10 ადამიანი. ქარხანა „ტიტან-ბარიკადები“ სწორედ იმ რაიონში მდებარეობს, რომელიც თავდასხმის შედეგად დაზიანდა.