სასულიერო პირები ელენე ხოშტარიას სოლიდარობას უცხადებენ.
დეკანოზი გიორგი წეროძე წერს, რომ ადამიანის ღირსება, ჯანმრთელობა და სიცოცხლე არ შეიძლება დამოკიდებული იყოს მის პოლიტიკურ შეხედულებებზე, პარტიულ კუთვნილებაზე.
“ადამიანის ღირსება, ჯანმრთელობა და სიცოცხლე არ შეიძლება დამოკიდებული იყოს მის პოლიტიკურ შეხედულებებზე, პარტიულ კუთვნილებაზე.
ქრისტიანისთვის სამართლიანობა შურის გაგრძელება კი არ არის, არამედ ადამიანის ღირსების დაცვაა, მაშინაც კი, როცა ეს რთულია.
Helen Khoshtaria გამბედაობა ცნობილია. ახლა ყველაზე მნიშვნელოვანი მისი ჯანმრთელობაა. ადამიანის ტკივილი არასოდეს უნდა იქცეს პოლიტიკური ბრძოლის ინსტრუმენტად” – წერს დეკანოზი გიორგი წეროძე.
პოლიტიკოსი ქალის ჯანმრთელობის მდგომარეობაზე წერს ასევე კონსტანტინოპოლის ეკლესიის ქართული სამრევლოს არქიმანდრიტი ილია ჯინჯოლავა.
სასულიერო პირი იმ პერიოდს იხსნებს, როდესაც ხოშტარია სტამბოლში სამკუირნალოდ ჩავიდა და მას სამრევლოში ესტუმრა.
“ელენე არაერთხელ ჩამოვიდა სტამბოლში სამკურნალოდ. სწორედ მისი სურვილით მესტუმრა ჩვენს სამრევლოშიც. მოგვიანებით არაერთხელ შევხვდით ქალაქშიც და გვქონდა ხანგრძლივი საუბრები, რომლებიც პოლიტიკას თითქმის არასოდეს ეხებოდა. უფრო მეტად ვსაუბრობდით რწმენაზე, მის საჯაროდ გამოხატვის სირთულეზე, პირად სულიერ გამოცდილებაზე, იმ დაბრკოლებებსა და შინაგან ბრძოლებზე, რომელთა წინაშეც ყოველი ადამიანი დგას, და იმ მადლზე, რომელსაც უფალი ადამიანს მოულოდნელად და ჩუმად განაცდევინებს.
პოლიტიკური შეხედულებების შეფასება არ არის ჩემი მოწოდება. მე ელენე სხვაგვარად გავიცანი, როგორც ადამიანი, რომლის შინაგანი სამყარო, სულიერი ძიება და განცდები გაცილებით ღრმაა, ვიდრე ეს გარედან, ერთი შეხედვით, შეიძლება ჩანდეს.
ამიტომ დღეს, ყველაფრის მიღმა, მხოლოდ ერთის თქმა შემიძლია: ადამიანურად მოვალედ მივიჩნევ თავს, სოლიდარული ვიყო მის მიმართ და გულწრფელად ვუსურვო ჯანმრთელობა, ძალა და ღვთის შეწევნა. ღმერთმა განამტკიცოს და მხნეობა მიანიჭოს“ — წერს კონსტანტინოპოლის ეკლესიის ქართული სამრევლოს არქიმანდრიტი ილია ჯინჯოლავა სოციალურ ქსელში.