„სოლიდარობა და მხარდაჭერა ექიმ გიორგი ჩახუნაშვილს“- ამ ლოზუნგით გლდანის პენიტენციური დაწესებულებასთან დღეს, 18:00 საათზე, აქცია გაიმართება.
როგორც აქციის ორგანიზატორები წერენ, სასურველია ექიმები თეთრი ხალათებით მივიდნენ.
„ჩვენი შეკრება არის მხარდაჭერის გამოხატულება ადამიანის მიმართ, რომელსაც ახლა განსაკუთრებით სჭირდება საზოგადოების გვერდში დგომა. ასეთ დროს დუმილი არ არის გამოსავალი — სოლიდარობა არის ძალა, რომელიც გვაერთიანებს და გვახსენებს, რომ არცერთი ადამიანი არ უნდა დარჩეს მარტო უსამართლობის წინაშე“, – აღნიშნავენ ორგანიზატორები.
ინფორმაციისთვის, 4 ოქტომბერს ათონელის სასახლესთან განვითარებულ მოვლენებთან დაკავშირებით ბრალდებული ექიმი გიორგი ჩახუნაშვილი სხდომათა დარბაზშივე დააკავეს.
კერძოდ, 4 ოქტომბერს, ათონელის სასახლესთან განვითარებულ მოვლენებთან დაკავშირებით ბრალდებული ექიმი, გიორგი ჩახუნაშვილი და კიდევ ექვსი პირი – ია დარახველიძე, დავით ჟღენტი, კონსტანტინე კოკაია, კახაბერ მჟავანაძე, ზაქრო ალბუთაშვილი და დავით სტურუა სასამართლომ დამნაშავედ ცნო. მათ სასამართლომ 5-5 წლით თავისუფლების აღკვეთა მიუსაჯა.