„ნაციონალური მოძრაობა“ ალიანსს ვერ გააჩერებს, – ამის შესახებ „ოპოზიციური ალიანსის“ ერთ-ერთმა ლიდერმა, ნიკა გვარამიამ ჟურნალისტებს განუცხადა.
ამასთან, მისი თქმით, ჯობია, რომ „ნაციონალური მოძრაობა“ „ოპოზიციური ალიანსიდან“ არ გავიდეს.
„ჯობია, რომ საერთოდ არ გავიდეს და დანარჩენი უკვე მისი გადასაწყვეტია. ჩვენ ეს ხელს არ გვიშლის, ვმუშაობთ. მუშაობაში ხელის შეშლა შეიძლება მხოლოდ შეფერხებით და ციხეში გაშვებით, რასაც ბიძინა ივანიშვილი აკეთებს. „ნაციონალური მოძრაობა“ ალიანსს ვერ გააჩერებს“, – განაცხადა გვარამიამ.
ასევე, მან უპასუხა ჟურნალისტის კითხვაზე, რა პოზიცია აქვს ჟურნალისტ ნანუკა ჟორჟოლიანის განცხადებაზე, როდესაც მან „ნიკა მელია მიხეილ სააკაშვილის ღალატში დაადანაშაულა“.
„კიდევ ერთხელ გავიმეორებ, ნანუკას ნათქვამზე კომენტარს, მითუმეტეს არ გავაკეთებ. ჩვენ შეგვიძლია ვიკომუნიციროთ არასატელევიზიო ეკრანებით“, – განაცხადა ნიკა გვარამიამ.
გარდა ამისა, მან ისაუბრა პატიმრობაში მყოფ კოალიციის ერთ-ერთი ლიდერის, ელენე ხოშტარიას ჯანმრთელობის მდგომარეობაზე.
„ელენეს უფრო მძიმე დაავადება აქვს ვიდრე საუბარი მიმდინარეობს. ახლა გაირკვა ეს, სამწუხაროდ, შეუშვან ექიმი და მერე ილაპარაკონ ექიმებმა სამედიცინო ენაზე“, – განაცხადა გვარამიამ.