ისე უყვარდა სიცოცხლე, წარმოუდგენელია, რომ აღარ იქნება, – ასე ახასიათებენ სოფელ კაკაბეთის მცხოვრებლები, 41 წლის ქალს, ნინო ნანუაშვილს, რომელიც წუხელ საგარეჯოს მუნიციპალიტეტში ავარიის შედეგად გარდაიცვალა.
გარდაცვლილ ქალს, ორი არასრულწლოვანი, 17 წლის ვაჟი და 12 წლის გოგონა დარჩა. ავტოსაგზაო შემთხვევა, გვიან ღამით, სოფელ მანავში მოხდა.
სატვირთო ავტომანქანა მინივენს შეეჯახა, რომელშიც რამდენიმე მგზავრი იმყოფებოდა. ადგილზე გარდაიცვალა ერთი და დაშავდა სამი ადამიანი.
“არსად მუშაობდა, დიასახლისი იყო. საუკეთესო ადამიანი, მეგობარი და დედა. ორ შვილს ზრდიდა. ვერ წარმოგვიდგენია მის გარეშე. თავზარი დაგვცა ამ ტრაგედიამ. ადამიანი სახლში მოდიოდა და შვილებთან ვეღარ მოაღწია. ისე უყვარდა სიცოცხლე, წარმოუდგენელია, რომ აღარ იქნება”,- ამბობენ სოფელ კაკაბეთში.
მომხდართან დაკავშირებით, გამოძიება სისხლის სამართლის კოდექსის 276- ე მუხლის მე-6-ე ნაწილით დაიწყო.