ჩვენ ირგვლივ არიან ადამიანები, ჩვენი კოლეგები, მეგობრები, ჩვენც სამედიცინო სფეროს წარმომადგენლები ვართ, ასე რომ, მის პაციენტებს არანაირი საფრთხე არ ემუქრებათ, ვეცდებით, რომ მაქსიმალურად ვიყოთ ჩართულები, – ამის შესახებ 4 ოქტომბერს განვითარებულ მოვლენებთან დაკავშირებით მსჯავრდებული ექიმის, გიორგი ჩახუნაშვილის შვილმა, დავით ჩახუნაშვილმა განაცხადა.
როგორც ის განმარტავს, მამის დაკავება მისთვის მოულოდნელი არ ყოფილა.
„მამაჩემსაც, როგორც უყურებდით, თვითონაც მზად იყო, მისი ყველა ახლობელი, ოჯახის წევრი თუ კეთილისმსურველი ელოდა ამ გადაწყვეტილებას. [არაფერი უთქვამს] გარდა იმისა, რასაც ყოველდღე ერთმანეთის შეხვედრისას ვეუბნებით ხოლმე – თბილი სიტყვები, ბრძოლისკენ, ჟინისკენ მოწოდება. არიან ჩვენ ირგვლივ ადამიანები, ჩვენი კოლეგები, მეგობრები, ჩვენც სამედიცინო სფეროს წარმომადგენლები ვართ, ასე რომ, მის პაციენტებს არანაირი საფრთხე არ ემუქრებათ, ვეცდებით, რომ მაქსიმალურად ვიყოთ ჩართულები“, – განაცხადა ჩახუნაშვილმა.
4 ოქტომბერს, ათონელის სასახლესთან განვითარებულ მოვლენებთან დაკავშირებით ბრალდებული ექიმი, გიორგი ჩახუნაშვილი და კიდევ 6 პირი – ია დარახველიძე, დავით ჟღენტი, კონსტანტინე კოკაია, კახაბერ მჟავანაძე, ზაქრო ალბუთაშვილი და დავით სტურუა სასამართლომ დამნაშავედ ცნო.
აღნიშნული გადაწყვეტილება მოსამართლე გიორგი გელაშვილმა მიიღო. მისი განაჩენით, შვიდივე ბრალდებული წარდგენილ ბრალდებაში დამნაშავედ ცნო.
ექვს მათგანს 5-5 წლით თავისუფლების აღკვეთა მიუსაჯა, ია დარახველიძეს კი 3 წლით თავისუფლების აღკვეთა.