“ფაქტი 4 წლის განმავლობაში მიჩქმალული იყო” – ასე ეხმაურება სამართალდამცველი ორგანოების კოორდინაციის საკითხებში სახელმწიფო მინისტრი მამუკა მდინარაძე “მელაძის შაბათის მიერ” გავრცელებულ კადრებს, რომელიც პოლიციაში წამებისა და არაადამიანურ მოპყრობას ასახავს.
მისი თქმით, “ხვალაც შეიძლება დანაშაული მოხდეს, 45 000 ადამიანში ვიღაცამ შეიძლება შეარცხვინოს კვლავ პოლიციის მუნდირი”.
ამის გარანტიას ვერავინ ვერავის ვერ მისცემს ვერასდროს. ვერც მე მივცემ მოსახლეობას გარანტიას, რომ ხვალ პოლიციელი რაღაც დანაშაულს არ ჩაიდენს, 45 000 ადამიანიდან რომელიღაცა. მაგრამ გარანტიას მე მივცემ იმისა, რომ დაუსჯელი ვერ დარჩება ვერცერთი… ყველას ვაფრთხილებ პოლიციელი იქნება თუ სხვა ადამიანი, რომელიც პოლიციელის დისკრედიტაციას შეეცდება. ერთის მხრივ პოლიციელის მუნდირის, გმირი ხალხის შეურაცხყოფას არავის გავუტარებ და მანიპულაციებით მათი დისკრედიტაციის კამპანიას, ისე როგორც გუშინ ვნახეთ, რომ იცოდნენ რომ დაკავებული იყო და ანონსში ეს შეგნებულად არ ჩასვეს და მეორეს მხრივ, პოლიციელი იქნება თუ რომელიმე უწყების სხვა წარმომადგენელი, მათაც პოლიციელის მუნდირის შეურაცხყოფას არ გავუტარებ” – ამბობს მამუკა მდინარაძე იმედის ეთერში.
მდინარაძე ამბობს, რომ დანაშაულის შესახებ მიმდინარე წლის თებერვალში გენერალურმა ინსპექციამ და სუს-მა, მიიღეს ინფორმაციები, რომ 4 წლით ადრე ჰქონდა დანაშაულებრივ ფაქტს ადგილი.
მისივე თქმით, “შეტყობინება 2022 წელს, როცა ეს დანაშაული მოხდა, არ იყო დაფიქსირებული არსად, არც დაზარალაებულებს მიუმართავთ არავისთვის და 4 წლის განმავლობაში ეს იყო მიჩქმალული ფაქტი”.
“რაც შეეხება ამ მართლაც საშინელ ფაქტს, მიმდინარე წლის თებერვალში, შეგვიძლია ვთქვათ, რომ პრაქტიკულად 4 დღის განმავლობაში სამართალდამცავმა სისტემამ მოახერხა ძალიან მცირე ინფორმაციიდან გასულიყო ბოლომდე და 3-4 დღის განმავლობაში შედეგი დადებულიყო და დაკავებული ყოფილიყვნენ მოძალადე პოლიციელები. 19 თუ 20 თებერვალს, გენერალურმა ინსპექციამ, ჩვენმა სამსახურმაც მაშინ – სუს-მა, მიიღეს ინფორმაციები, რომ 4 წლით ადრე ჰქონდა დანაშაულებრივ ფაქტს ადგილი, საზარელ ფაქტს, როგორც ხედავთ კადრებში და ამის შესახებ არცერთი შეტყობინება, არცერთი ინფორმაცია არ იყო არსად.
შეტყობინება 2022 წელს, როცა ეს დანაშაული მოხდა, არ იყო დაფიქსირებული არსად, არც დაზარალაებულებს მიუმართავთ არავისთვის და 4 წლის განმავლობაში ეს იყო მიჩქმალული ფაქტი, ამიტომ რეაგირება ბუნებრივია ვერ იქნებოდა, არავისთვის ეს ცნობილი არ იყო, მაგრამ იმის გამო, რომ გადაღებული კადრები 1-2 ადამიანთან მოხვდა, ისევ თავის წრეში დაატრიალეს, ასე ვთქვათ, ამის შესახებ მიღებული იყო ინფორმაცია და ამაზე იყო მყისიერი რეაგირება” – განაცხადა მამუკა მდინარაძემ სანქცირებული სამთავრობო TV იმედის ეთერში.
“შაბათის ეთერის მიერ მოპოვებული” ვიდეო-კადრებით დგინდება, რომ მოქალაქეთა წამების კადრებს პოლიციელები თავად იღებდნენ და საერთო ჩათში აგზავნიდნენ – TV პირველის გამომძიებელმა ჟურნალისტებმა ამ ეტაპზე 5 ვოდეო-მასალაშის მოპოვება შეძლეს, სადაც პოლიციაში წამებისა და არაადამიანური მოპყრობის ფაქტები ჩანს – სახეზეა მინიმუმ სამი დაზარალებული.
ერთ-ერთი ვიდეომასალაში ცხადად ჩანს იძულება – უარის შემდეგ ახალგაზრდა კაცს, თავს კედელზე არტყმევინებენ.
პოლიციაში დაკითხვაზე მიყვანილი ახალგაზრდების წამების ზოგიერთ კადრში შესაძლებელია, სავარაუდო მოძალადე პოლიციელების გარჩევა, ისმის მათი ხმები და ჩანს ნაწილის სახეც.