ბოლო დეკლარაციების მიხედვით, “ქართული ოცნების” დეპუტატ ლევან მაჭავარიანს უძრავი ქონება არ აქვს, უძრავი ქონება არ ირიცხება არც ფინანსთა მინისტრის – ლაშა ხუციშვილისა და მისი ოჯახის სახელზე.
პარლამენტარებისა და მინისტრების ოფიციალური დეკლარაციები რადიო თავისუფლებამ შეისწავლა.
“ფინანსთა მინისტრის დეკლარაციაში სრულადაა ასახული ყველა ის ინფორმაცია, რასაც ითვალისწინებს კანონმდებლობა. არც მისი და არც მისი ოჯახის წევრის სახელზე, არ ირიცხება უძრავი/მოძრავი ქონება. შესაბამისად, დეკლარაციაში აღნიშნული გვერდები არ შეიცავს მონაცემებს“, – ასე უპასუხეს გამოცემას ფინანსთა სამინისტროდან.
დეპუტატმა ლევან მაჭავარიანმა კი რადიო თავისუფლებას უთხრა, რომ თბილისში, ონიაშვილის ქუჩაზე ბინა და ავტოფარეხი 2025 წელს გაყიდა, ტრანზაქციას კი მომავალ დეკლარაციაში ასახავს.
ბოლო დეკლარაციის მიხედვით, მაჭავარიანს 148 000 დოლარის ღირებულების ნაღდი ფულის დანაზოგი აქვს, რომელიც 2025 წელს უძრავი ქონების გასხვისებიდან მიღებული შემოსავალია.
მაჭავარიანი რადიო თავისუფლებასთან ამბობს, რომ ახლა მშობლების სახლში ცხოვრობს.