სისხლიანი ანგარიშსწორება ნათესავებს შორის, სავარაუდოდ, ძროხისა და მიწის ფართობებთან დაკავშირებულ მრავალწლიან დავას უკავშირდება. 70 წლის კაცმა ნათესავს საკუთარ საცხოვრებელ სახლში სანადირო თოფიდან რამდენჯერმე ესროლა – მიღებული ჭრილობების შედეგად 55 წლის მამაკაცი ადგილზე გარდაიცვალა.
რა გახდა სისხლიანი ანგარიშსწორების ზუსტი მიზეზი, ეს გამოძიებამ უნდა დაადგინოს, თუმცა ადგილობრივები ყვებიან, რომ სოფელ ოქტომბერში მცხოვრებ მამაკაცებს შორის დიდი ხნის განმავლობაში კონფლიქტი არსებობდა. დავა ძროხის ბალახობის ადგილის გამო დაიწყო.
“პირველების“ ინფორმაციით, სანადირო თოფით მოკლული პენსიონერი სოფელ ოქტომბრის მკვიდრი ედიშერ შამუგიაა. სწორედ შამუგიას საცხოვრებელი სახლი გახდა სისხლიანი ანგარიშსწორების ადგილი, სადაც საგამოძიებო სამსახურის თანამშრომლები რამდენიმე საათის განმავლობაში ინტენსიურ საგამოძიებო მოქმედებებს ატარებდნენ.
გავრცელებული ინფორმაციით, მამაკაცებს შორის თავდაპირველად სიტყვიერი დაპირისპირება მოხდა. არსებული ვერსიით, ამის შემდეგ ბახუ შამუგია საკუთარ სახლში წავიდა, საიდანაც ცეცხლსასროლი იარაღი გამოიტანა, შემდეგ კი ნათესავის საცხოვრებელ სახლთან დაბრუნდა და მას რამდენჯერმე ესროლა.
დანაშაულის ჩადენიდან რამდენიმე საათის შემდეგ განზრახ მკვლელობისთვის სავარაუდოდ ბრალდებული პენსიონერი სამართალდამცველებმა ძებნილად გამოაცხადეს, თუმცა მამაკაცი, რომელმაც, არსებული ინფორმაციით, ნათესავი ცეცხლსასროლი იარაღით მოკლა, საკუთარ სახლში გარდაცვლილი იპოვეს. პირველადი ინფორმაციით, დანაშაულის ჩადენის შემდეგ მამაკაცმა სიცოცხლე თვითმკვლელობით დაასრულა.