სასახლის ღობის საქმეზე დაკავებული კიდევ 6 ბრალდებული ციხეს უახლოეს დღეებში დატოვებს. საპროცესო შეთანხმება მათ პროკურატურამ ბრალის აღიარების სანაცვლოდ გაუფორმა. სამი წელი პირობითი მსჯავრი – ეს არის სასჯელი, რომელიც მათ დაეკისრებათ. ხვიჩა გოგოხია, გიორგი რურუა, გიორგი ქორქია, ლევან ჯიქია, ლაშა ივანაძე და სერგო მეგრელიშვილი დარბაზიდან გათავისუფლდებიან. პროკურატურის პასუხს განსასჯელის სკამზე მყოფი ბრალდებულები თვეები ელოდებოდნენ. მათ ნაწილს უკვე დიდი ხანია საპროცესოს გაფორმება სურდა, ნაწილმა კი გადაწყვეტილება დღევანდელ პროცესზე მიიღო.
4 ოქტომბრის მოვლენების დროს დაკავებული აქციის 21 მონაწილე საპროცესო გარიგებას დათანხმდა, თუმცა ეს რიცხვი სავარაუდოდ კიდევ გაიზრდება. ბრალდებულების ნაწილმა, ვინც ისევ განაჩენის მოლოდინშია პირდაპირ სხდომათა დარბაზში განაცხადა, რომ გათავისუფლების სანაცვლოდაც არ აპირებს დანაშაულის აღიარებას, რომელიც არ ჩაუდენია. მათ რიგებშია ბათუმელი მედროშეც, რომელიც მოსამართლეს პროცესებიდან გაძევებული ჰყავს.
საბოლოო სიტყვის უფლებით განსასჯელის სკამზე მყოფი რვა პირი 15 ივნისს ისარგებლებს. ამ დღეს გლდანის ციხიდან სასამართლოში მიიყვანენ ზურა ჭავჭანიძესაც. არსებობს მოლოდინი, რომ მოსამართლე რომეო ტყეშელაშვილი საქმეზე საბოლოო განაჩენს ამავე დღეს გამოაცხადებს.