“აირჩიონ მერე, [სომხებმა ევროკავშირი] ვინ დაუშალა? სომხეთზე ადრე ავირჩიეთ ევროკავშირიც და ნატოს წევრობაც” – ლადო ბოჟაძე

„ქართული ოცნების“ დეპუტატი ლადო ბოჟაძე კვლავ ამტკიცებს, რომ ევროკავშირის ცალკეული ქვეყნები საქართველოს რუსეთ-უკრაინის ომში ჩართვას ცდილობენ. ამის შესახებ მან სომხეთში ჩატარებული საპარლამენტო არჩევნებისა და პრემიერ-მინისტრ ნიკოლ ფაშინიანის პარტიის გამარჯვების შეფასებისას ისაუბრა.

ამასთან, დეპუტატი დღეს ამტკიცებდა, რომ საქართველო ევროკავშირსა და ნატოში ინტეგრაციის გზაზე სომხეთზე წინ დგას და ხაზი გაუსვა, რომ ქვეყანას უკვე აქვს ევროკავშირთან უვიზო მიმოსვლა, მაშინ როდესაც სომხეთი კვლავ დსთ-ისა და კოლექტიური უსაფრთხოების სისტემის წევრად რჩება.

“სამწუხაროდ, ევრობიუროკრატიას და ევროკავშირის ნაწილ ქვეყნებს, განსაკუთრებით ბალტიისპირეთს, აქვს მცდელობა, რომ ჩვენ ჩავერთოთ ღიად ამ ომში და დაპირისპირებაში, ვგულისხმობ რუსეთ-უკრაინის ომს, რაზეც ჩვენ ვამბობთ უარს. რაც შეეხება რუსეთის ჯარს, ჩვენს ქვეყანაში რუსეთის ჯარი დგას უკანონოდ, ოკუპირებულია ჩვენი ქვეყნის ტერიტორიები, სომხეთში დგას სომხეთისვე თანხმობით. რაც შეეხება საფრთხეს, ბუნებრივია, უმთავრესი საფრთხე ჩვენი ქვეყნისთვის არის სწორედ რუსეთი.

აირჩიო მერე (სომხეთმა ევროკავშირი), ვინ დაუშალათ? სომხეთზე ადრე ავირჩიეთ ევროკავშირიც და ნატოს წევრობაც. სომხეთზე წინ ვართ ჩენ ევროკავშირისკენ მიმავალ გზაზეც და ნატოსკენ მიმავალ გზაზეც. სომხეთი დღესაც არის დსთ-ს წევრი, დღესც არის უსაფრთხოების ერთიანი სისტემის წევრი, ჩვენ დიდი ხანია აღარ ვართ დსთ-ს წევრები და უსაფრთხოების წევრები სომხეთისგან განსხვავებით. ჩვენ გვაქვს უვიზო მიმოსვლა და სომხეთს არ აქვს და ა.შ. ასე რომ, რაც მეტი სახელმწიფო დაინტერსდება ევროკავშირთან ურთიერთობების გაღრმავებით, რა თქმა უნდა, ეს უკეთესი იქნება ჩვენთვისაც მათ შორის” – ამბობს ბოჟაძე.