უკრაინაში განაცხადეს, რომ რუსული უპილოტო საფრენი აპარატი ჩერნობილში გადამუშავებული ბირთვული საწვავის საცავს დაესხა თავს. უკრაინული კომპანია „ენერგოატომის“ ინფორმაციით, რუსული დრონი 7 ივნისის ღამეს ცენტრალიზებული საცავის შენობას მოხვდა.
თავდასხმის შედეგად კონტეინერების მიმღები შენობა ნაწილობრივ დაინგრა. მასში გადამუშავებული ბირთვული საწვავი არ ინახებოდა. დარტყმის შემდეგ გაჩნდა ხანძარი, რომლის ფართობმაც 40 კვადრატული მეტრი შეადგინა. ცეცხლი ჩააქრეს, პერსონალს შორის დაშავებულები არ არიან.
„ენერგოატომში“ განაცხადეს, რომ ობიექტის ტერიტორიაზე რადიაციული ფონი ნორმის ფარგლებში რჩება.
მომხდარს უკრაინის პრეზიდენტი ვოლოდიმირ ზელენსკიც გამოეხმაურა.
„უმნიშვნელოვანესი ინფრასტრუქტურის ობიექტი. და უაღრესად მზაკვრული რუსული დარტყმა. რუსეთმა შეგნებულად მიიტანა იერიში სწორედ ბირთვული ინფრასტრუქტურის ამ ობიექტზე. ამ დროისთვის რადიაციული ფონის ნორმის გადაჭარბება არ ფიქსირდება. მაგრამ ცალსახად გადაჭარბებულია ისედაც ყოველგვარ საზღვრებს გასული რუსული თავხედობა. უკრაინელმა მაშველებმა დარტყმის შემდეგ ამ ობიექტზე ხანძარი ჩააქრეს. და საჭიროა რეალური, ახალი ნაბიჯები მსოფლიოს მხრიდან, რათა რუსებმა იგრძნონ, რომ მათი ასეთი ტერორისტული ომი არის დარტყმა თავად რუსეთზე “, – დაწერა ზელენსკიმ სოციალურ ქსელში.