ბენზინისა და დიზელის პარალელურად, საქართველოში თხევადი გაზიც გაძვირდა. საქსტატის მონაცემებით, მაისში ფასმა თითქმის 7%-ით მოიმატა. ამასთან, რეკორდულ მაჩვენებელზეა გაზის იმპორტის მაჩვენებელიც, რომელიც ასევე გაძვირებულია. ინფორმაციას “BM.GE” ავრცელებს.
კერძოდ, საქსტატის საგარეო ვაჭრობის პორტალის მონაცემებით, წელს იანვარ-აპრილში ქვეყანაში 7.985 მლნ დოლარის ღირებულების 16 750 ტონა გათხევადებული პროპანი შემოვიდა. ეს კი 2009 წლის შემდეგ ყველაზე მაღალი მაჩვენებელია. (პორტალზე აღნიშნულ პროდუქტზე მონაცემები სწორედ 2009 წლიდან იძებნება).
რაც შეეხება გასულ წელს, შარშან 4 თვეში 3.688 მლნ დოლარის 10 051 ტონა გათხევადებული გაზის იმპორტი განხორციელდა. აღნიშნული მონაცემებიდან ჩანს, რომ გასულ წელს ერთი ლიტრი გათხევადებული გაზის იმპორტი ქვეყანას (გადასახადების გარეშე) 0.36 დოლარი უჯდებოდა, წელს კი 0.47 დოლარი (ზრდა 30%-ია).
უცნობია იმპორტიორი ქვეყნების ჩამონათვალი. როგორც საქსტატში „ბიზნესპრესნიუსს“ განუცხადეს, ინფორმაცია იმის შესახებ, თუ რომელი ქვეყნიდან შემოდის ქვეყანაში გათხევადებული პროპანი, კონფიდენციალურია. არადა, დაახლოებით 2-3 თვის წინ აღნიშნული მონაცემები ღია იყო და დაინტერესებულ პირს შეეძლო იმპორტიორი ქვეყნების ჩამონათვალის ნახვა. „ბიზნესპრესნიუსი“ იანვარ-თებერვლის იმპორტის მონაცემებზე დაყრდნობით წერდა კიდეც, რომ იმ პერიოდში გათხევადებული აირის თითქმის 100% რუსეთიდან შემოვიდა, უმნიშვნელო მოცულობის, დაახლოებით 300 დოლარის ღირებულების კი არაბთა გაერთიანებული საამიროებიდან.