რა ღირს 33-სართულიანი კორპუსების შენების უფლება ბათუმში? – “საერთაშორისო გამჭვირვალობამ” შეისწავლა იაშა შერვაშიძის გზა დეპუტატობიდან დეველოპერობამდე. “ნაციონალური მოძრაობიდან” “ქართულ ოცნებაში” წარმატებით გადაბარგებული დეპუტატი ბათუმის ცენტრალური სტადიონის მიმდებარედ ახლა 8 კორპსუსის ასაშენებლად ემზადება. სამშენებლო ტერიტორიის ნაწილი 2014 წელს, დეპუტატობისას აუქციონზე, მაგრამ უკონკურენტოდ იყიდა.
იაშა შერვაშიძის ახალი პროექტი 106 მეტრიანი კორპუსებისგან შედგება. ჯამში 4 ათას ბინაზე მეტი. შპს “სიელ ჰოლდინგს” ექსდეპუტატის შვილი და ცოლი ფლობენ, თავად დირექტორია. წლებია შერვაშიძის ოჯახი “ოცნების” გულუხვი დამფინანსებელია. მან, მისმა ოჯახმა და ბიზნესპარტნიორებმა ივანიშვილის პარტიას 345 ათასი ლარი შესწირეს. თავად იაშა შერვაშიძე ვერ იხსენებს, რამდენით დააფინანსა “ქართული ოცნება”.
“საერთაშორისო გამჭვირვალობა” წერს, რომ ქედის ყოფილი მაჟორიტარის სამშენებლო ბიზნესი კარგად მიდის, 2012 წლიდან ბათუმის ახალი ბულვარის მიმდებარედ კორპუსებს აშენებს – სამშენებლო სამუშაოების წარმოების პერიოდს ემთხვევა ოცნების სასარგებლოდ გაღებული დიდი ფული. “საერთაშორისო გამჭვირვალობაში” ფიქრობენ, რომ წარმატებული ბიზნესი სწორედ პოლიტიკური ლოიალობის დამსახურებაა.