მაშველებმა გორში, ხევში ჩავარდნილი ძაღლი გადაარჩინეს – მიუსაფარ ცხოველთა მართვის სააგენტო სოციალურ ქსელში წერს.
“ა(ა)იპ მიუსაფარი შინაური ცხოველების მართვის შიდა ქართლის ინტერმუნიციპალური სააგენტოს ცხელ ხაზზე შემოსული შეტყობინების საფუძველზე, სააგენტოს სწრაფი რეაგირების ბრიგადამ და მეხანძრე-მაშველებმა ერთობლივი ძალებით გორში, მდინარე მეჯუდის სიახლოვეს, ხევში ჩავარდნილი ძაღლი გადაარჩინეს.
განსაკუთრებული მადლობა ზარის ინიციატორს, რომელმაც არ ჩაუარა გულგრილად ამ პატარა სიცოცხლის გასაჭირს და დროულად მოგვმართა. ასევე, მადლობას ვუხდით მეხანძრე-მაშველებს ოპერატიული და პროფესიონალური თანამშრომლობისთვის.
ძაღლი გადმოყვანილია სააგენტოში. მას უახლოეს დღეებში ჩაუტარდება ყველა საჭირო პროცედურა.
შემდეგ კი ყველაზე მნიშვნელოვანი ეტაპი დაიწყება – შევეცდებით, ვუპოვოთ მზრუნველი ოჯახი.
თითოეული გადარჩენილი სიცოცხლის უკან დგას ადამიანური სიკეთე, თანადგომა და პასუხისმგებლობა. სწორედ ამიტომ, თუ ცხოველი გასაჭირში დაინახეთ, ნუ დარჩებით გულგრილები” – წერს მიუსაფარ ცხოველთა მართვის სააგენტო სოციალურ ქსელში.