სასახლის ღობის საქმე ფინალშია. ორ კვირაში უნდა გაირკვეს პოლიციელებზე ჯგუფური ძალადობის ბრალდებით გაუშვებენ თუ არა 14 პირს ციხეში, თუმცა დღეს ირკვევა, რომ გამოძიებას მე-9 თვეა არ დაუდგენია იმ პირების ვინაობა, ვინც პოლიციელები რეალურად სცემა. კარგად შენიღბული და აქციის მონაწილეებში შერეული ათამდე მოქალაქე, რომელიც ღობის გადანგრევის და ფიზიკური დაპირისპირების შემდეგ ადგილიდან უბრალოდ ქრება იდენტიფიცირებული დღემდე არ არის. არსებობს ეჭვი რომ ესენი იყვნენ პროვოკატორები, რომლებმაც მშვიდობიანი აქციის დისკრედიტაცია სცადეს.
4 ოქტომბრის საქმის განხილვა დღეს დაპირისპირების ფონზე მიმდინარეობდა. მოსამართლე რომეო ტყეშელაშვილმა დასკვნითი სიტყვა ადვოკატ დიმიტრი ვარდიაშვილს რამდენჯერმე შეაწყვეტინა. გამოძიების და სასამართლოს მიერ საქმის შეკერვაზე საუბრის დროს კი მოსამართლე უფლებადამცველს სპეციალური ზომების მიღებითაც დაემუქრა.
მოსამართლის ვერდიქტის მოლოდინში მყოფი ადვოკატები ამბობენ, რომ სასამართლოს გადაწყვეტილება უკვე მიღებული აქვს. უფლებადამცველების თქმით ამაზე მეტყველებს 4 ოქტომბრის გამოყოფილ საქმეზე მიღებული გადაწყვეტილება, სადაც პოლიტიკოსებთან ერთად დაკავებულები ციხეში 5 წლით გაუშვეს.