ევროკომისიის პრესსპიკერმა “ფორმულას” დიუშენის სამკურნალო მედიკამენტთან დაკავშირებით მისწერა:
“ჩვენთვის ცნობილია იმ გამოწვევების შესახებ, რომელთა წინაშეც დიუშენის კუნთოვანი დისტროფიით დაავადებული ქართველი ბავშვები დგანან, და ვაცნობიერებთ იმ სირთულეებს, რომლებსაც ისინი და მათი ოჯახები განიცდიან.
ეს საკითხი საქართველოს ხელისუფლების ექსკლუზიურ კომპეტენციასა და პასუხისმგებლობას განეკუთვნება. ამ სფეროში გადაწყვეტილებების მიღება საქართველოს პრეროგატივაა, მისი ეროვნული კანონმდებლობისა და ჯანდაცვის პოლიტიკის ჩარჩოების შესაბამისად.
ასევე აღვნიშნავთ, რომ ევროკავშირშიც სწორედ ეროვნულ მთავრობებს ეკისრებათ ძირითადი პასუხისმგებლობა თავიანთი მოქალაქეებისთვის ჯანდაცვის სერვისებისა და სამედიცინო მომსახურების ორგანიზებასა და მიწოდებაზე.
ევროკომისიამ 2025 წლის ივნისში გასცა ევროკავშირის პირობითი ნებართვა ბაზარზე დაშვების შესახებ პრეპარატ „გივინოსტატზე“ [givinostat] – მედიკამენტზე, რომელიც გამოიყენება დიუშენის კუნთოვანი დისტროფიის სამკურნალოდ. ეს გადაწყვეტილება დაეფუძნა ევროპის წამლის სააგენტოს დადებით მეცნიერულ შეფასებას“ – მისწერა ევროკომისიის პრესსპიკერმა “ფორმულას”.