გორში ძალადობის ბრალდებით დაკავებულ 6-ვე პოლიციელს აღკვეთის ღონისძიების სახით პატიმრობა შეეფარდათ.
მოსამართლე გერმანე დადეშქელიანმა ადგილზე თათბირით გადაწყვიტა და ექვსივე პოლიციელს აღკვეთის ღონისძიების სახით პატიმრობა შეუფარდა. ძალადობით უფლებამოსილების გადამეტებაში ბრალდებული პოლიციელების წინასასამართლო განხილვა 24 ივლისს ჩაინიშნა.
27 მაისს გორიდან გავრცელდა კადრები, სადაც ჩანს, რომ კომბინატის დასახლებაში პოლიციელები მოქალაქეებს ფიზიკურად გაუსწორდნენ და დააკავეს. მოგვიანებით პროკურატურამ გაავრცელა განცხადება, რომ გორში პოლიციელების მხრიდან მოქალაქეებზე ძალადობაზე გამოძიება დაიწყო. საღამოს კი პირი, ვისზეც პოლიციელებმა იძალადეს – პაპუნა ლოცულაშვილი – დააკავეს. ამის შემდეგ, რამდენიმე საათში, ლოცულაშვილმა გორის წინასწარი მოთავსების იზოლატორი დატოვა და ის კლინიკაში გადაიყვანეს, სადაც სამედიცინო კვლევები ჩაუტარდა. პროკურატურამ 28 მაისს გაავრცელა ინფორმაცია, რომ მომხდართან დაკავშირებით 6 პოლიციელი დააკავეს. მათ ბრალდება სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით წარედგინებათ, რაც სამსახურებრივი უფლებამოსილების გადამეტებას გულისხმობს, ჩადენილს ძალადობით.
დაკავებულები არიან:
ვლადიმერ გოდერძიშვილი დაბადებული 2004 წელს;
ვანიკო მისირელი, დაბადებული 2002 წელს;
გიორგი ზაკო წკრიალაშვილი დაბადებული 1995 წელს
ალექსი ბადალოვი დაბადებული 1990 წელს
ბესო მალაციძე დაბადებული 1992 წელს
საბა წაველიძე დაბადებული 2006 წელს