“შევეკითხე რა არის დიუშენი, წარმოდგენა არა აქვს…” – ბათუმის საკრებულოს წევრი „ქართული ოცნებიდან“, ექიმი ნერიმან ცინცაძე აქტივისტებზე, რომლებიც დიუშენის პაციენტებისთვის ქუჩებში ხელმოწერებს აგროვებენ

ბათუმის საკრებულოს წევრმა „ქართული ოცნებიდან“, პროფესიით ექიმმა ნერიმან ცინცაძემ დღეს, 29 მაისს, ბათუმის საკრებულოს სხდომაზე გააკრიტიკა აქტივისტები, რომლებიც დიუშენის პაციენტებისთვის წამლის მოთხოვნის მიზნით ქუჩებში ხელმოწერებს აგროვებენ. ინფორმაციას ,,ბათუმელები” ავრცელებს.

“დაიწყო ილიაუნის შექებით, რომ ილიაუნიმ ჩაატარა რაღაცა აქცია, შეკრიბა რაღაცა თანხა, რა უჭირს მერე? ძალიან კარგი ქნა. ილიაუნის მაგის გასაჭირი არ აქვს… ჩვენი მოსახლეობის ინფორმაციისთვის მინდა ვთქვა, ბავშვები და ზრდასრულები რომლებიც არიან და რამდენადაც მახსოვს 100 პაციენტი არის საქართველოში, ეს პაციენტები მიიღებენ შესაბამის მკურნალობას, იქნება შესაბამისი პრეპარატები საქართველოში დარეგისტრირებული რომლებმაც გაიარეს არა პირობითი ავტორიზაცია, არამედ ნამდვილი ავტორიზაცია…
ყველა კუთხე-კუნჭულში რომ გამოხტებიან, არ მინდოდა ამ სიტყვის თქმა, მაგრამ მართლაც გამოხტა. უნივერსიტეტში მივდიოდი და ხელს ხომ არ მოაწერთ პეტიციასო. შევეკითხე რა არის დიუშენი. წარმოდგენა არა აქვს. რამდენი პაციენტი გვყავს საქართველოში, ამაზეც აბსოლუტურად წარმოდგენა არ აქვს და ამას მოაყოლა დითირამბები და ისეთი საუბარი, რომ გადავწყივტე, რომ არ ავყოლოდი, რომ მერე ისეთი ცუდი რაღაცა არ მეთქვა, რაც მინდოდა მეთქვა. მინდოდა რაღაც ძალიან ცუდი პასუხი გამეცა… ნუ სპეკულირებთ ამ თემით. მე მეცოდებიან ბავშვები და მეცოდება მათი მშობლები, რომლებიც ჯერჯერობით თქვენი წაყლობით არიან გაუგებრაობაში ” – თქვა ნერიმან ცინცაძემ.