თავდაცვის ყოფილი მინისტრ თინა ხიდაშელი თეა წულუკიანის განცხადებას პასუხობს, სადაც წულუკიანმა გორში მომხდარი ამბის შემდეგ პოლიციელებს მიმართა და სთხოვა “ნუ მისცემენ მტრებს სალაპარაკოს“.
ხიდაშელის თქმით, როცა ადამიანს მხოლოდ ის აწუხებს, რომ შემთხვევას მტრები გამოიყენებენ და არა უშუალოდ მომხდარი ძალადობა, “ამას ჰქვია ფსკერზე დაშვება“.
“ანუ პრობლემა ის არის რომ გამოგვიჭირეს და სალაპარაკო მიეცემათო ხომ? ხომ სწორად გავიგე? თან მტრებსო ხომ? არა როგორ შეიძლება ოპონენტი, კრიტიკოსები ან რამე მსგავსი გამოიყენოთ
მაინც რომ დავაზუსტოთ! ამ პატარა წინადადებაში რამხელა ბოროტებაა.
– ძალადობა ოკ, უბრალოდ გამოგვიჭირეს
– ვინც ამაზე ილაპარაკებს მტერია!
– მტრები გამოიყენებენ და ეს არის საწუხი და სადარდებელი, სხვა არაფერი აწუხებს
კი ზუსტად ამას ქვია ფსკერზე დაშვება”- წერს ხიდაშელი.
ცნობისთვის, გორში, ე.წ. კომბინატის დასახლებაში სამართალდამცავები ორ პირს – პაპუნა ლოცულაშვილსა და მის მეგობარს ფიზიკურად გაუსწორდნენ.
28 მაისს, პროკურატურამ გორში, „კომბინატის დასახლებაში“ მოქალაქეზე ძალადობის საქმეზე ექვსი პოლიციელი დააკავა. ძალადობაში მხილებულ პოლიციელებს 5-დან 8 წლამდე პატიმრობა ემუქრებათ.
პოლიციელების ნაწილი ხაშურის, ნაწილი კი დიღმის დროებითი მოთავსების იზოლატორებში გადაიყვანეს.
მათ წინააღმდეგ საქმე აღძრულია სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით (სამსახურებრივი უფლებამოსილების გადამეტება, ჩადენილი ძალადობით). მუხლს დაკავებულის ადვოკატი და სხვა იურისტები არ ეთანხმებიან და მის გადაკვალიფიცირებას მოითხოვენ.