გასულ ღამეს, პირი, რომელზეც გორში პოლიციელებმა იძალადეს, კლინიკა “ვივამედში” გადაიყვანეს – ინფორმაციას ამის შესახებ “ინტერპრესნიუსი” დაზარალებულის ადვოკატზე, ლაშა ტყეშელაძეზე დაყრდნობით ავრცელებს. მისივე ცნობით, პაპუნა ლოცულაშვილს მრავლობითი დაზიანებები აღენიშნება როგორც სახის არეში, ასევე, სხეულზე.
“სახეზე აღენიშნება მრავლობითი დაზიანება. ეჭვი გვაქვს, რომ შეიძლება ჰქონდეს ტვინის შერყევა. ასევე, დაზიანებული ჰქონდეს სახის ძვლები. როცა უტარდებოდა ექსპერტიზა და ცხვირზე მოკიდეს ხელი, ძალიან ეტკინა. მაშინვე თქვა ექსპერტმა , რომ უნდა გადაგვეყვანა კლინიკაში. ასევე, სხეულზე აქვს სხვადასხვა მრავლობითი დაზიანებები – სხვადასხვა არეში, ხელებზე, ფეხებზე, მუცელზე და ა.შ” – აცხადებს ადვოკატი IPN-სთან.
გუშინ, 27 მაისს, გორიდან გავრცელდა კადრები, სადაც ჩანს, რომ კომბინატის დასახლებაში პოლიციელები მოქალაქეებს ფიზიკურად გაუსწორდნენ და დააკავეს. მოგვიანებით პროკურატურამ გაავრცელა განცხადება, რომ გორში პოლიციელების მხრიდან მოქალაქეებზე ძალადობაზე გამოძიება დაიწყო. საღამოს კი პირი, ვისზეც პოლიციელებმა იძალადეს, დააკავეს. ამის შემდეგ, რამდენიმე საათში, ლოცულაშვილმა გორის წინასწარი მოთავსების იზოლატორი დატოვა და ექსპერტიზაზე გადაიყვანეს.