აგარეჯოს ერთ-ერთ სუპერმარკეტში არასრულწლოვანმა მოლარეს წიწაკის სპრეი შეასხა – ინტოქსიკაცია მიიღეს მაღაზიაში მყოფებმაც, მათ შორის ბავშვებმა – ამის შესახებ ინფორმაციას ადგილობრივი გამოცემა მთავარი ამბები კახეთიდან ავრცელებს და წერს, რომ შემთხვევა 25 მაისს მოხდა, მაშინ როდესაც მაღაზიაში თანამშრომლები, მყიდველები და ბავშვებიც იმყოფებოდნენ.
გამოცემის ცნობით, ინციდენტის შედეგად ბავშვებს პირღებინება, ხოლო უფროსებს ცრემლდენა და ინტოქსიკაციის სხვა სიმპტომები გამოუვლინდათ და მათ სამედიცინო ჩარევა დასჭირდათ
“ჩვენს მაღაზიაში დაფიქსირდა საგანგაშო შემთხვევა. შემოვიდა ორი პიროვნება, რომლებმაც გაავრცელეს მომწამვლელი ნივთიერება. შედეგად, მოქალაქეებსა და თანამშრომლებს განუვითარდათ ინტოქსიკაცია. ფაქტი ჩვენი მხრიდან შეფასებულია, როგორც უკიდურესად მძიმე და საზოგადოებისთვის საშიში ქმედება“ – ნათქვამია სუპერმარკეტის განცხადებაში
შინაგან საქმეთა სამინისტრომ გამოძიება ჯანმრთელობის განზრახ მსუბუქი დაზიანების მუხლით დაიწყო