წალენჯიხის მუნიციპალიტეტის სოფელ ლესალეში ადგილობრივი მოსახლეობა, სამეგრელოში მყოფ, “ძლიერი საქართველო- ლელოს” ლიდერს, ირაკლი კუპრაძეს შეხვდა და წლების განმავლობაში მოუგვარებელი ინფრასტრუქტურულ პრობლემები გაუზიარა.
ამის შესახებ ინფორმაციას პარტიის პრესსამსახური ავრცელებს.
როგორც გავრცელებულ ინფორმაციაშია ნათქვამი, ადგილობრივების განცხადებით, სოფელში საავტომობილო გზა მძიმე მდგომარეობაშია და მიუხედავად არაერთი დაპირებისა, მისი რეაბილიტაცია ამ დრომდე არ მომხდარა. მათივე თქმით, დაზიანებული გზა სოფელს განსაკუთრებით უამინდობის დროს ფაქტობრივად იზოლაციაში აქცევს და გარე სამყაროსთან მოწყვეტილს ტოვებს.
“ადგილობრივები ამბობენ, რომ არსებული ვითარება უკვე პირდაპირ საფრთხეს უქმნის მათი ოჯახების , ბავშვების სიცოცხლეს, რადგან საჭიროების შემთხვევაში სოფელში ვერ ადის სასწრაფო სამედიცინო დახმარების ეკიპაჟი, რაც კრიტიკულ სიტუაციებში დროული დახმარების მიღებას შეუძლებელს ხდის”, – ნათქვამია გავრცელებულ ინფორმაციაში.