“ევროპელი სოციალისტების” ჯგუფის თავმჯდომარემ, ლადო ბოჟაძემ დიუშენის კუნთოვანი დისტროფიით დაავადებული მოზარდებისთვის საჭირო მედიკამენტის დასახელება არ იცის, თუმცა მაინც ამტკიცებს, რომ წამალს აღიარება არ აქვს (საუბარია Givinostat-ზე, რომელიც დიდ ბრიტანეთმა პაციენტებისათვის ხელმისაწვდომი გახადა).
“რატომ უნდა ვიცოდე წამლის დასახელება, ჯანდაცვის მინისტრი ხომ არ ვარ?” – უთხრა ბოჟაძემ სტუდენტებს.
პარლამენტის წევრი დღეს ,,დაიცავი ილიაუნის” უწყვეტი მარათონის წარმომადგენლებს მაშინ შეხვდათ, როცა ისინი მთავრობის ადმინისტრაციიდან ილიაუნის მიმართულებით მიდიოდნენ. სწორედ მარათონის წევრებმა დაუსვეს მას კითხვები.
ლადო ბოჟაძე ამბობს, რომ სახელმწიფო წამალს მხოლოდ მაშინ ჩამოიტანს, როცა მას აღიარება და გარანტია ექნება.
“კი ვამბობ, რომ ეს წამალი შეიძლება მათი შვილებისთვის საზიანო იყოს. მშობლებმა კარგად იციან, რომ წამალს შეიძლება ჰქონდეს დადებითი თვისებაც და უარყოფითიც. (მათი გადაწყვეტილება არ არის, მიიღებენ თუ არა მათი შვილები წამალს) ეს სახელმწიფოს გადაწყვეტილება უნდა იყოს, სახელმწიფო უნდა იყოს პასუხისმგებელი იმ მედიკამენტზე, რომელსაც შემოიტანს.
ჩამოიტანს სახელმწიფო იმ წამალს მხოლოდ მაშინ, როცა მას ექნება აღიარება, გარანტია. სექტემბერში არის ერთ-ერთი კვლევა, რომელიც უნდა დასრულდეს. გითხარით მე რა უნდა ქნათ – ჯანდაცვის მინისტრის მოხსენება მოისმინოთ ან მიბრძანდეთ ჯანდაცვის სამინისტროში”, – ამბობს ბოჟაძე.
გასული კვირის ბოლოს, დიდმა ბრიტანეთმა დიუშენის კუნთოვანი დისტროფიის მქონე პაციენტებისათვის ის ერთ-ერთი მედიკამენტი გახადა ხელმისაწვდომი, რომლის შემოტანასაც საქართველოში ორ წელზე მეტია ითხოვენ დიუშენის სინდრომის მქონე ბავშვების მშობლები.
ეს იმას ნიშნავს, რომ დიდი ბრიტანეთის სახელმწიფო მოქალაქეებს Givinostat-ით მკურნალობას დაუფინანსებს.
Givinostat-ი კუნთოვანი დისტროფიის მქონე პაციენტებისათვის განკუთვნილი ერთ-ერთი თანამედროვე პრეპარატია, რომელიც FDA-მ 2024 წელს დაამტკიცა და ასევე 2025 წლის ივნისიდან სპეციალური პირობებითაა ხელმისაწვდომი ევროპის ქვეყნებშიც.