საჯარო სკოლებში, მოზარდებში ახალი საშიში თამაშებია გავრცელებული. არსებული ინფორმაციით, არასრულწლოვნები ერთმანეთს სახიფათო მოქმედებების შესრულებას აიძულებენ, რაც რიგ შემთხვევებში ჯანმრთელობის დაზიანებისა და გონების დაკარგვის მიზეზიც გამხდარა.
კონფიდენციალური წყარო “ტვ პირველს” უყვება, რომ მისი 14 წლის შვილი თანაკლასელების მხრიდან ძალადობის მსხვერპლი გახდა, შემდგომ კი ეს ძალადობრივი კადრები მოზარდებმა სხვადასხვა სოციალურ პლატფორმებზე ატვირთეს. ქალი ამბობს, რომ ბავშვი საავადმყოფოშიც კი მოხვდა.
არსებული ინფორმაციით, აღნიშნული თამაში სხვადასხვა საჯარო სკოლებშია გავრცელებული. ირკვევა, რომ კონრეტული დაჯგუფება ირჩევს მსხვერპლს, რომელსაც ფიზიკურ დაზიანებებს აყენებს. სახიფათო თამაშის მიზანია, რომ მსხვერპლი გაითიშოს, შემდეგ ეს ფაქტი ვიდეოზე აღბეჭდონ.
“ტვ პირველი” დღეს სხვადასხვა სკოლებშიც იმყოფებოდა, სადაც პედაგოგები ადასტურებენ, რომ მსგავს შემთხვევებს სკოლებში ადგილი ნამდვილად აქვს.
“ვართ ინფორმირებულები. გადავეციტ ინფორმაცია მშობლებს. გავრცელდა ეს იფორმაცია, თამაშობენ ახლა… მხოლოდ ინფორმაცია უნდა მივაწოდოთ ბავშვებს იმის თაობაზე, თუ რა საშიში შედეგები შეიძლება, მოჰყვეს. შედეგი ეს არის, ინფორმირება მშობლების, ბავშვების” – პედაგოგი.
“ყურადღებით ვართ, დირექციამაც გაგვაფრთხილა, რომ ვიყოთ ყურადღებით. ამ თემებზე ვმუშაობთ. მსგავის გაჟღერებული ერთი ფაქტი თუნდაც გარედან მოსმენილი, უკვე საყურადღებოა, რომ რამე არ მოხდეს ისეთი, რომ სკოლაში რამე სახიფათოს წინაშე დადგეს ბავშვი” – ამბობს კიდევ ერთი პედაგოგი.
ცნობილია, რომ სახიფათო თამაშის შესახებ ინფორმაცია სკოლა “კრეატივმაც” გაავცრელა და მშობლებს ყურადღებით ყოფნისკენ მოუწოდა.
მშობელი, რომელმაც აღნიშნულის შესახებ “ტვ პირველს” აცნობა, ამბობს, რომ მომხდარის შესახებ განათლების სამინისტროს უკვე შეატყობინა. რა პასუხი აქვს ამ თემაზე სამინისტროს, ჯერჯერობით უცნობია.