საქართველო დამოუკიდებლობის დღის აღსანიშნავად ემზადება — 26 მაისამდე რამდენიმე დღით ადრე თავისუფლების მოედანზე ბოლო რეპეტიციები მიმდინარეობს. საზეიმო ღონისძიებისთვის ქართველი სამხედროები აქტიურად ემზადებიან, რომლებიც დამოუკიდებლობის დღეს ტრადიციულ საზეიმო აღლუმში მიიღებენ მონაწილეობას.
განსაკუთრებული მზადებაა წვევამდელთა ეროვნული სამხედრო სამსახურის რეკრუტებშიც. სწორედ 26 მაისს, საზეიმო ვითარებაში დადებული ფიცის შემდეგ, ისინი ოფიციალურად შეუერთდებიან თავდაცვის ძალებს. დამოუკიდებლობის დღისადმი მიძღვნილი ღონისძიებები ქვეყნის მასშტაბით გაიმართება.
“დღეს მესამე დღეა თავდაცვის ძალების პირადი შემადგენლობა ემზადება დამოუკიდებობის დღის აღსანიშნავად. როგორც საზოგადოებისთვის უკვე ცნობილია, 13 რეგიონში ახალწვეულები დადებენ ფიცს, მათ შორის თავისუფლების მოედანზე, აქ. 21 ქალაქში იქნება სამხედრო ტექნიკის და შეიარაღების გამოფენა”, – ამბობს სამხედრო მეთაური.