ლევან ხაბეიშვილის თანაგუნდელები მოსამართლე ირაკლი ხუსკივაძის ვერდიქტს ელოდებიან – ენმ-ს წევრებს არ სჯერათ, რომ სასამართლო დამოუკიდებელ და ობიექტურ გადაწყვეტილებას გამოაცხადებს.
დღეს ივანიშვილის სასამართლოს მორიგი პოლიტიკური ეგზეკუციის დღეა – თქვა ცოტა ხნის წინ სასამართლოსთან გამართულ ბრიფინგზე ლევან ბეჟაშვილმა.
მისი თქმით, სწორედ დღეს “ივანიშვილის მორჩილი მოსამართლე პოლიტიკურ განაჩენს გამოუცხადებს ლევან ხაბეიშვილს”.
ბეჟაშვილი ამბობს, რომ ვერცერთი განაჩენი ვერ შეაჩერერებს ხალხის ბრძოლას თავისუფლებისთვსიდ ა ევროპული მომავლისთვის.
“ეს არ არის სასამართლო, ეს არ არის სამართალი, ეს არის პოლიტიკური ანგარიშსწორების მანქანა, რომელიც 2012 წლიდან მიზნად ისახავს მხოლოდ ერთ რამეს, გაანადგუროს ქვეყანაში თავისუფალი სიტყვა და აზრი, „ნაციონალური მოძრაობა“, პოლიტიკური ოპოზიცია და ყველა, ვინც ეწინააღმდეგება რუსულ რეჟიმს. დღეს საქართველოში შექმნილია ვითარება, როდესაც ყველაფერს განკარგავს რუსი ოლიგარქი, ამიტომ ყველა ადამიანი, რომელიც ებრძვის რუს ოლიგარქს, არის საფრთხის წინაშე. „ნაციონალური მოძრაობის“ პარტიის თავმჯდომარე მიხეილ სააკაშვილი პოლიტდევნილია და პუტინის პირადი პატიმარია. ის ისჯება მხოლოდ იმიტომ, რომ შექმნა ახალი ქართლი სახელმწიფო, გააძლიერა ეს ქვეყანა, წაიყვანა ევროპისკენ და თავი არ დაუხარა რუსეთს. პოლიტპატიმრები არიან ირაკლი ნადირაძე და ჩვენი ათობით წევრი, რომლებიც 4 ოქტომბერს იცავდნენ თავისუფლებას, ევროპულ მომავალს და საქართველოს.
ახლა რეჟიმს უნდა, გაასამართლოს ლევან ხაბეიშვილი, რომელიც იდგა ხალხის გვერდით და ერთადერთ რამეს მოუწოდებდა სპეცრაზმს, რომ მათ არ განეხორციელებინა ძალადობა საკუთარი ხალხის წინააღმდეგ, არ გამოეყენებინათ მხუთავი გაზი ადამიანების წინააღმდეგ, არ შეესრულებინათ დანაშაულებრივი ბრძანებები და არ გამხდარიყვნენ ბრმა იარაღი რუსული რეჟიმის ხელში ხალხის წინააღმდეგ. ამიტომ, დღეს ყველას გვმართებს განსაკუთრებული ერთობა, იმისთვის, რომ გავერთიანდეთ რუსული რეჟიმის წინააღმდეგ.
დღეს ივანიშვილის სასამართლოს მორიგი პოლიტიკური ეგზეკუციის დღეა. დღეს ივანიშვილის მორჩილი მოსამართლე გამოუცხადებს პოლიტიკურ განაჩენს „ნაციონალური მოძრაობის“ პოლიტსაბჭოს თავმჯდომარეს ლევან ხაბეიშვილს. ივანიშვილმა უნდა იცოდეს, რომ ვერც ერთი მოსამართლე, ვერც ერთი განაჩენი, ვერც ერთი ციხე ვერ გააჩერებს ხალხის ბრძოლას. ეს ბრძოლა გაგრძელდება საბოლოო გამარჯვებამდე, სანამ არ შეწყდება პოლიტიკური დევნა და ყველა პოლიტიკური პატიმარი თავისუფალი არ იქნება, ეს ბრძოლა აუცილებლად დასრულდება ქართველი ხალხის გამარჯვებით, თავისუფლება აუცილებლად გაიმარჯვებს“, – განაცხადა ბეჟაშვილმა.
მოსამართლე ირაკლი ხუსკივაძე ლევან ხაბეიშვილის საქმეზე დღეს სავარაუდოდ, განაჩენს გამოაცხადებს. სასამართლო სხდომა 13:30 საათზე გაიხსნება.
ხაბეიშვილს, რომელსაც პოლიტიკური განცხადების გაკეთებას და სპეცრაზმელებისთვის პირდაპირი ეთერიდან ქრთამის შეთავაზებას ედავებიან, დღეს ბოლოჯერ მიმართავს საზოგადოებას.