“დიდი დიღმის ტრამვაის მშენებელ კომპანიასთან ხელშეკრულება ივნისის ბოლომდე გაფორმდება” – კახა კალაძე

კახა კალაძის განცხადებით, ტრამვაის ხაზის მოწყობაზე ტენდერში მონაწილეობის სურვილი და შესაბამისი სატენდერო წინადადებები ოთხმა მსხვილმა კომპანიამ და ერთობლივმა საწარმომ წარადგინა

თბილისის მერის განმარტებით, გამარჯვებული კომპანიასთან ივნისის ბოლომდე გაფორმდება ხელშეკრულება და დაუყოვნებლივ დაიწყება უშუალოდ პროექტის განხორციელება.

მისივე თქმით, ტრამვაის ხაზი დაიწყება დიდი დიღმის მესამე და მეოთხე მიკრორაიონების გადაკვეთის მიმდებარე ტერიტორიიდან და დავით აღმაშენებლის ხეივნისა და დიღმის მასივის გავლით დაუკავშირდება მეტროსადგურ „დიდუბის“ ტერიტორიას.

“მინდა შევახსენო საზოგადოებას, დიდი დიღმისა და მეტროსადგურ „დიდუბის“ დამაკავშირებელი ტრამვაის ხაზის პროექტირებისა და მშენებლობის მიზნით გამოცხადებული ტენდერი მიმდინარე წლის 31 მარტს გაიხსნა. ტენდერი მიმდინარეობს აზიის განვითარების ბანკის შესყიდვის წესებით. მოცემულ ტენდერში მონაწილეობის სურვილი გამოთქვა და შესაბამისი სატენდერო წინადადებები წარმოადგინა ოთხმა მსხვილმა კომპანიამ და ერთობლივმა საწარმომ. დღეის მდგომარეობით, წარმოდგენილი წინადადებების შეფასებების პირველი ეტაპი დასრულდა, პრეტენდენტებთან მიმდინარეობს დეტალების დაზუსტდება. დაზუსტებული ინფორმაციის წარმოდგენის შემდეგ გამოვლინდება გამარჯვებული კომპანია, რომელთანაც ივნისის ბოლომდე გაფორმდება ხელშეკრულება და დაუყოვნებლივ დაიწყება უშუალოდ პროექტის განხორციელება.

ტრამვაის ხაზი დაიწყება დიდი დიღმის მესამე და მეოთხე მიკრორაიონების გადაკვეთის მიმდებარე ტერიტორიიდან და დავით აღმაშენებლის ხეივნისა და დიღმის მასივის გავლით დაუკავშირდება მეტროსადგურ „დიდუბის“ ტერიტორიას.

ხაზის სიგრძე 7.5 კმ არის, სადაც 11 გაჩერება იქნება განთავსებული. პროექტი ისტორიული მნიშვნელობისაა, აღნიშნული სახეობა წლების შემდეგ დაუბრუნდება დედაქალაქს. დარწმუნებული ვარ, ეს არ იქნება პირველი და ბოლო ტრამვაის პროექტი. ეს სილამაზე და მნიშვნელოვანი საზოგადოებრივი ტრანსპორტი დაუბრუნდება დედაქალაქს, პროექტი სამომავლოდ განხორციელდება რაიონებშიც, სხვა უბნებშიც“,- განაცხადა კალაძემ.