“ოპოზიციის ალიანსის” განცხადებით, კარდაკარის ფარგლებში მათ “ოცნება” ტიტუშკას” უგზავნის – ოპოზიციონერი პოლიტიკოსების თქმით, მათ სხვადასხვა უბანში ერთი და იგივე პროვოკატორი ხვდებათ, რომელიც შეხვდრების ჩაშლას და დაპირისპირების პროვოცირებას ცდილობს. როგორც ალიანსის წევრები ამბობენ, სწორედ ასეთი შემთხვევა იყო გუშინ ნაძალადევის რაიონში.
პოლიტიკოსების თქმით, “ტიტუშკას” თან დაჰყვება სავარაუდოდ, სუს-ის წარმომადგენელი, რომელიც ამ ყველაფერს ტელეფონით იღებს. ეს ჩანს კადრებშიც, რომელიც ნიკა გვარამიამ გუშინ ფბ-ზე გაავრცელა. როგორც ალიანსის წევრები აცხადებენ, ნაძალადევამდე, მსგავსი შემთხვევა იგივე პირის მონაწილეობით იყო გლდანშიც.
პოლიტიკოსები ფიქრობენ, რომ “ქართულ ოცნებას” ამ ქმედებით 26 მაისის შეკრების დისკრედიტაცია უნდა. “26 მაისი დამოუკიდებლობის დღეა და ისინი ამ დღის გაშავებას ვერ შეძლებენ” – ამბობს გიორგი ვაშაძე.
“ეს იგივე ადამიანია, რომელიც პოსტვ-იმ დააფიქსირა გლდანის მეტროსთან. ერთი და იგივე ადამიანია. ანუ ტიტუშკებიც გამოელიათ როგორც ჩანს. და მეორე მნიშვნელოვანი საკითხი რაც არის – შედით სოციალურ ქსელებში, ნახეთ მათი ტრო-ბოტები რა დღეში არიან, რომ გააშაონ 26 მაისი. 26 მაისი დამოუკიდებლობის დღეა და ისინი ამას ვერ იზამენ. ჩვენ უკვე კარგად ვიცით მათი ხელწერა – სიბინძურე, ლანძღვა-გინება, ხელოვნურად დაგეგმილი პროვოკაციები. ამას ჩვენ ვუპირისპირებთ სიმშვიდეს. “ქართული ოცნების” მხარდამჭერებს ვეუბნები – “გიწვდით ხელს”, დავდგეთ ერთად და მართლაც ძლიერი, ერთიანი და რეგიონის ლიდერი საქართველო ავაშენოთ”, – განაცხადა გიორგი ვაშაძემ.
ალიანსი საინფორმაციო კამპანიას დღეს დილიდანაც აგრძელებს. ოპოზიციის ლიდერები თსუ-ს მიმდებარედ ფლაერებს არიგებენ და ხალხს ესაუბრებიან.
“გირჩი-მეტი თავისუფლების” ლიდერის, ზურა ჯაფარიძის თქმით, 26 მაისს აუცილებელია, რომ ქუჩაში რაც შეიძლება მეტი ადამიანი გამოვიდეს
“ბრძოლა გრძელდება და ეს უნდა დავანახოთ მათ შორის პატიმრებს ციხეში და ჩვენს მეგობრებს დასავლეთში” – ამბობს ჯაფარიძე.
“უნდა ვიყოთ ძალიან ბევრი, იმიტომ, რომ გვჭირდება. დიდი ხანია არ ყოფილა მრავალრიცხოვანი აქცია. გვჭირდება, რომ ერთმანეთი დავინახოთ, ერთმანეთი გავამხნევოთ. გვჭირდება მათ შორის, რომ ერთმანეთს რწმენა გავუძლიეროთ, რომ აქ ბრძოლა გრძელდება და ეს დავანახოთ მათ შორის პატიმრებს ციხეში და დავანახოთ ჩვენს მეგობრებს დასავლეთში, რომ მიუხედავად ამ რეპრესიული კანონდებლობისა, მიუხედავად იმისა, რომ ტროტუარზე იჭერენ ადამიანებს ბრძოლა მაინც არ შეწყვეტილება. მიუხედავად იმისა, რომ ახლა აპირებენ, ფბ-ზე კომენტარების გამო ადამიანები დასაჯონ, ბრძოლა თავისუფლებისა ამ ქვეყანაში არ გაჩერებულა”, – ამბობს ზურა ჯაფარიძე.