მთავრობის ადმინისტრაციასთან დიუშენის კუნთოვანი დისტროფიით დაავადებული ბავშვების მშობლებმა 28 ღამე გაათენეს. მშობლები ამ დრომდე შვილებისთვის სასიცოცხლოდ მნიშვნელოვანი მედიკამენტის შემოტანას ითხოვენ, თუმცა მთავრობისგან ამის პირობას ვერ იღებენ.
მშობლები ამბობენ, რომ დრო არ იცდის და მათი შვილების მდგომარეობა დღითიდღე უარესდება. პროტესტის მონაწილეები აცხადებენ, რომ უკან დასახევი გზა აღარ დარჩათ და ამიტომ, ბრძოლას ვერ შეწყვეტენ.
“ჩემი შვილიშვილი უკვე ეტლში ზის, ქვემო კიდურებს ვეღარ ამოძრავებს, ამიტომ რახან ეს დაავადება კუნთოვანია და ყოველ კუნთს იმორჩილებს, ანადგურებს, ამიტომ ჩვენ ვცდილობთ როგორმე წამალი დროზე შამოიტანონ, რომ შეუნარჩუნდეთ კიდურების მოძრაობა მაინც, ხელების მოძღაობა მაინც. დრო არ ითმენს, თუ წამალი დროზე არ სემოიტანეს, ამ ბავშვს უკვე შეეზღუდება მოძღაობა მთლიანად. ამიტომ მშობლები უკიდურეს ზომამდე ვართ. არ გავჩერდებით კი არა, ვერ გავჩერდებით, ძალიან საფრთხეში ვართ!” – ამბობს მშობელი.
დღესვე კანცელარიასთან ის მოქალაქეები შეიკრიბებიან, რომლებიც დიუშენით დაავადებულ ბავშვებს მხარდაჭერას უცხადებენ. ისინი კიდევ ერთხელ შეეცდებიან, პროტესტის ხმა “ქართული ოცნების” ხელისუფლებას გააგონონ.