ბოლო პერიოდის ერთ-ერთ ყველაზე სასტიკ და რეზონანსულ საქმეზე — თაზო მთივლიშვილის მკვლელობის საქმეზე, სასამართლოში კიდევ ერთხელ დაიკითხა მთავარი მოწმე ვერონიკა კაპანაძე. დანაშაულის შეუტყობინებლობის ბრალდებით დაკავებულმა ახალგაზრდა ქალმა სასამართლოს დეტალურად უამბო ის მძიმე ეპიზოდები, რომლებიც, მისი თქმით, მკვლელობამდე რამდენიმე საათით ადრე ვითარდებოდა.
კაპანაძის ჩვენებით, ბრალდებული გიორგი პაპაშვილი თაზო მთივლიშვილზე საათების განმავლობაში ძალადობდა. მისი თქმით, ერთ-ერთ ეპიზოდში პაპაშვილმა სამზარეულოს საჭრელი დაფა დაზარალებულს თავში რამდენჯერმე ჩაარტყა. მოწმის განცხადებით, დარტყმები იმდენად ძლიერი იყო, რომ დაფა სამ ნაწილად დაიმტვრა.
ახალგაზრდა ქალი ასევე ამტკიცებს, რომ ძალადობა ხანგრძლივი პერიოდის განმავლობაში გრძელდებოდა. მისი თქმით, 22 წლის მეშაურმე პერიოდულად სააბაზანოში გადაჰყავდათ, სადაც გონს მოჰყავდათ, თუმცა მდგომარეობის გაუმჯობესების შემდეგ ფიზიკური ანგარიშსწორება კვლავ გრძელდებოდა.
გამოძიების ვერსიით, ვერონიკა კაპანაძე პირადად შეესწრო თაზო მთივლიშვილის წამებისა და მკვლელობის ფაქტებს, თუმცა სამართალდამცველებისთვის არ მიუმართავს და არც სასწრაფო დახმარება გამოუძახებია. თავად კაპანაძე აცხადებს, რომ მკვლელობის შემდეგ გიორგი პაპაშვილი ცხედრის დანაწევრებას გეგმავდა და მას ამ პროცესში თანამონაწილეობასაც აიძულებდა.