თბილისის საქალაქო სასამართლოში, დღეს, ოპოზიციონერი პოლიტიკოსის, ალეკო ელისაშვილის პროცესი გაიმართება. სისხლის სამართლის საქმეზე ბრალდებული საბადრაგო სამსახურმა რუსთავის ციხიდან უკვე გადაიყვანა სასამართლოში. პროცესი 13:00 საათზეა ჩანიშნული.
არსებული ინფორმაციით, დღევანდელ პროცესზე პროკურატურის მოწმეები დაიკითხებიან.
ალეკო ელისაშვილის ადვოკატის, არჩილ ჩოფიკაშვილის თქმით, დაცვის მხარე ყველა მოწმის გამოკითხვაში მიიღებს მონაწილეობას.
“ყველა მოწმის გამოკითხვაში აბსოლუტურად მივიღებთ მონაწილეობას, ჯვარედინი დაკითხვის წესით დავკითხავთ მოწმეებს. წინა მოწმის დაკითხვამ დაადასტურა, რომ შემთხვევის ადგილიც დათვალიერდა ისე, რომ არცერთი გაზომვა, არცერთი დეტალი, რც აუცილებელია ასეთი საქმეების გამოძიების დროს, მითითებული არ ყოფილა. ვერცერთი ინფორმაცია ექსპერტმა ვერ დაადასტურა, თუ რა ფართობზე იყ მოსხმული ის აალებადი ნივთიერება, რა დეტალები იყო გამოვლენილი შემთხვევის ადგილის დათვალიერების დროს, რასაც ძალიან დიდი მნიშვნელობა აქვს საქმისათვის და მიუთითებს, რომ საქმე გამოძიებული არის არაკვალიფიციურად, ზერელედ და ამ საქმის ერთადერთი შემადგენელი ნაწილია პოლიტიკური ნაწილი და ეს საქმე ემსახურება იმას, რომ ოპოზიციური პოლიტიკოსი იყოს განეიტრალებული, რაც ამ დრომდე, სამწუხაროდ, მიღწეულია,” – განაცხადა არჩილ ჩოფიკაშვილმა.
ელისაშვილი 2025 წლის 29 ნოემბერს, თბილისის საქალაქო სასამართლოს კანცელარიის დაწვის მცდელობის ბრალდებით დააკავეს და ბრალი “სისხლის სამართლის კოდექსის” 323-ე მუხლით წაუყენეს, რაც ტერორისტული აქტის მცდელობას გულისხმობს.
2026 წლის მარტში კი, მას ბრალი მეორე ეპიზოდზე წარედგინა. პროკურატურა ამტკიცებს, რომ ალეკო ელისაშვილმა თბილისის სასამართლოს შენობაში ცეცხლის გაჩენა 2025 წლის 4 მაისსაც სცადა.