“ვლოცულობთ, რომ მოგემადლოთ ხანგრძლივი, კურთხეული და ნაყოფიერი წინამძღვრობა, ღვთის სადიდებლად” – მსოფლიო პატრიარქი ბართლომეოს I შიო III-ს საქართველოს კათოლიკოს-პატრიარქად აღსაყდრებას ულოცავს:
“თქვენო უნეტარესობავ და უწმინდესობავ, უფლისმიერო საყვარელო ძმაო,
დიდი სიხარულით მივიღეთ პირადად ჩვენ და მსოფლიო საპატრიარქოში მომსახურე თითოეულმა პირმა სასიხარულო უწყება თქვენი საყვარელი უნეტარესობის ღირსეული არჩევის შესახებ სრულიად საქართველოს უძველეს და სახელოვან კათოლიკოს-საპატრიარქო ტახტზე, განსვენებული და მარადსახსოვარი კათოლიკოს-პატრიარქის, ილია II-ის შემცვლელად, რომელმაც ბრწყინვალე და ისტორიული სამსახური გაუწია საქართველოს პატივცემულ ეკლესიასა და მთლიანად მართლმადიდებლობას.
ვადიდებთ რა უფალს, თავისი ეკლესიის დამაარსებელსა და მფარველს, ძმურად ვულოცავთ თქვენს უნეტარესობას და ვლოცულობთ, რომ მოგემადლოთ ხანგრძლივი, კურთხეული და ნაყოფიერი წინამძღვრობა, ღვთის სადიდებლად, თქვენი ერთგული მრევლის საკეთილდღეოდ, ქართველი ერის მშვიდობისა და სტაბილურობისთვის, აგრეთვე, ჩვენთან და სხვა და-მართლმადიდებელი ეკლესიების მეთაურებთან ჰარმონიული თანამშრომლობით, პან-მართლმადიდებლური ერთიანობის, თანამშრომლობისა და მსოფლიოს წინაშე საერთო მოწმობის განსამტკიცებლად და წინსვლისთვის. Ἄξιος! (აქსიოს!)” – ვკითხულობთ წერილში.