ნოემბერ-დეკემბრის აქციებზე სასტიკად ნაცემი ზვიად მაისაშვილი აცხადებს, რომ ძალადობის მასშტაბებიდან გამომდინარე, მხოლოდ 5 პირის პასუხისმგებლობაზე საუბარი არასაკმარისია. მისი თქმით, აქციების დარბევა სისტემურ ხასიათს ატარებდა და პასუხისმგებლობა ეკისრებათ არა მხოლოდ უშუალო შემსრულებლებს, არამედ იმ პირებსაც, ვინც ბრძანებები გასცა და სამართალდამცველების იდენტიფიცირება შეუძლებელი გახადა.
“დაზარალებული ადამიანების რიცხვი იყო უამრავი, შეუძლებელია, ეს ექნა 5 ადამიანს. ასევე ჩვენ ის კადრები, რაც ვნახეთ იმ დროის განმავლობაში, ეს რა ხდებოდა 1 და 2 დღე, ეს გრძელდებოდა დღეების განმავლობაში სრული უკონტროლო წამება და სისასტიკე, რასაც ვხედავდით იქ ავტობუსებში. არ არის მხოლოდ იმ ადამიანების ბრალი, ვინც ეს განახორციელა ფიზიკურად, უდიდესი წვლილი მიუძღვით ამ საქმეში მათ, ვინც ეს დავალება გასცეს. ასევე იმ ადამიანებს, ვინც, ფაქტობრივად, შეუძლებელი გახადეს ამ ადამიანების იდენტიფიცირება და ამოცნობა” – ამბობს მაისაშვილი.
ლევან ხაბეიშვილზე, გურამ როგავასა და ზვიად მაისაშვილზე თავდასხმის ბრალდებით 3 ყოფილი და 1 მოქმედი სპეცრაზმელი, ასევე დაცვის პოლიციის მოქმედი თანამშრომელი დააკავეს – განცხადება საქართველოს მთავარმა პროკურორმა გიორგი გვარაკიძემ გააკეთა.
ირკვევა, რომ 5-დან ორი, სხვადასხვა სისხლის სამართლის საქმეზე მიმდინარე გამოძიების ფარგლებში, უკვე პატიმრობაში იმყოფება.