პატრიარქობის ერთ-ერთი კანდიდატის, მეუფე გრიგოლის პირველი კომენტარი ახალი პატრიარქის გამორჩევის შემდეგ:
“როგორ შეიძლება რამე პოზიციაზე ვისაუბროთ, როდესაც შედგა გაფართოებული საეკლესიო კრება და გაიმართა არჩევნები და ყველამ თავისი გადაწყვეტილება მიიღო. დიდება და მადლობა ღმერთს ყველაფრისათვის. ჩვენთვის მთავარია, რომ ჩვენ სულიერი ერთობა შევინარჩუნოთ, რადგან ეკლესია ყოველთვის ასე იყო ჩვენთვის, განსაკუთრებით ჩვენი ერისთვის, რომ ის იყო გამამთლიანებელი და ბურჯი იყო ჩვენი ეროვნულობისაც და სახელმწიფოებრიობისაც და ამდენად, მე იმედი მაქვს და მჯერა, რომ ასე გავაგრძელებთ. მე სიტყვაში აღვნიშნე კიდევაც, რომ ჩვენ თუ ერთგვარი რაღაც პაექრობისმაგვარი გვაქვს არჩევნებში, ეს არ ნიშნავს, რომ ჩვენ ერთმანეთის მოწინააღმდეგეები და მტრები ვართ, ჩვენ ყველანი ვართ სულიერი ძმები და ვისაც არ უნდა გაემარჯვა, ნებისმიერ შემთხვევაში, ჩვენ ერთად გავაგრძელებთ ამ ქვეყნის კეთილდღეობისთვის და ჩვენი ერის სულიერი ერთობისთვის ზრუნვას, ლოცვას და შრომას.
ასე რომ დიდება და მადლობა ღმერთს ყველაფრისათვის. ღმერთმა დალოცოს სრულიად საქართველო! ღმერთმა დალოცოს ახლად არჩეული კათოლიკოს პატრიარქი, საქართველოს ეკლესიის წმინდა სინოდი და მისი სისავსე!” – თქვა “ტვ ფორმულასთან” ხობისა და ფოთის მიტროპოლიტმა მეუფე გრიგოლმა.
დღეს წმინდა სინოდმა 22 ხმით საქართველოს ახალ კათოლიკოს-პატრიარქად შიო III აირჩია. შედეგები ასეთია: შიო III 22 ხმა; მეუფე იობი – 9 ხმა; მეუფე გრიგოლი – 7 ხმა; გაუქმდა 1 ხმა.