ბიზნესმენი ლაშა პაპაშვილი, რომელიც სინოდის გაფართოებულ სხდომას დელეგატის სტატუსით ესწრებოდა, ამბობს, რომ ძალიან გახარებულია მეუფე შიოს გამორჩევით.
ვფიქრობ, რაღაც გარდამტეხი იქნება მეუფე შიოს მოსვლა საპატრიარქო ტახტზე – უთხრა ჟურნალისტებს კრების დასრულების შემდეგ პაპაშვილმა.
“ძალიან გახარებული ვარ მე და ალბათ, მთელი საქართველო. მთელი ქვეყანა რასაც ელოდა – მეუფე შიოს გამორჩევა ისტორიული მოვლენაა და მადლობა ღმერთს და ყველას. გილოცავთ, რომ ხართ მონაწილე ამ ისტორიული დღის. ღმერთმა შეაძლებინოს მეუფე შიოს იმ უმძიმესი ტვირთის ტარება, რომელიც მხოლოდ ილია მეორემ შეძლო ასე ბრწყინვალედ ეტარებინა. ვფიქრობ, რაღაც გარდამტეხი იქნება მეუფე შიოს მოსვლა საპატრიარქო ტახტზე”, – განაცხადა ლაშა პაპაშვილმა.
საქართველოს ახალი, რიგით 142-ე პატრიარქი 57 წლის მიტროპოლიტი შიო, [ერისკაცობაში ელიზბარ თეიმურაზის ძე მუჯირი] გახდა. საქართველოს კათოლიკოს- პატრიარქი გაფართოებულ საეკლესიო კრებაზე მეუფე შიომ 22 ხმა მიიღო.
ურბნისისა და რუისის ეპარქიის მიტროპოლიტმა იობმა 9 ხმა მიიღო, ფოთისა და ხობის მიტროპოლიტმა გრიგოლმა კი 7 ხმა. გაუქმდა ერთი ხმა.